Read Waray Samarenyo Meaning Based Mga Salmo 35 Bible Online

Mga Salmo 35 - Waray Samarenyo Meaning Based bible

Mga Salmo 35

¹[58] Kontraha adton mga nakontra ha akon, O GINOO, ngan awaya adton mga nakikiaway ha akon!

²Dad-a an imo taming ug hinganiban ngan kadi pagbulig ha akon.

³Alsaha an imo bangkaw ngan iaraway nga atsa kontra han mga nagbubukod ha akon. Sumati ako nga ikaw an akon Magtaralwas!

⁴Mapirde ngan maalohan unta an mga nagtitinguha pag-iparatay ha akon! Magbalik ngan magupong unta an mga naglalarang hin paglingo kontra ha akon!

⁵Mapariho unta hira han upa nga iginpapalid han hangin, Samtang binubukod hira han anghel han GINOO!

⁶Magmasirom ngan magmadalunot unta an ira aragian samtang hinahampak hira han anghel han GINOO!

⁷Nagbutang hira hin bitik para ha akon hin waray ano man nga hinungdan ngan nagbuho hin hilarom nga luong pagdakop ha akon.

⁸Kundi hiaabtan hira hin kabungkagan ha diri pa nira hibabaroan ito; mag-uunay hira kadakop han ira kalugaringon nga bitik ngan kahulog ha luong nga ira ginbuho!

⁹Niyan magmamalipayon ako tungod han GINOO; magmamalipayon ako kay gintalwas ako niya.

¹⁰Masiring ako ha GINOO hin kinasingkasing, “Waray gud usa nga pariho ha imo! Pinananalipdan mo an maluya tikang han makusog, an pobre ngan kabos tikang han nagtatalumpigos!”

¹¹Natestigo kontra ha akon an magraot nga mga tawo ngan isinusumbong ako hin mga sala nga waray ko gud labot.

¹²Binabalos nira hin maraot an maupay ko nga buhat ngan nagtuturaw gud ako.

¹³Kundi nagbisti ako hin kamabidoon han kasakit nira; nag-antos pa ako hin pagpuasa; nag-ampo ako nga dinuko an akon ulo,

¹⁴sugad han akon pag-aampo para hin sangkay o hin bugto. Naglinibotlibot ako nga natamod hin kamabidun-on, sugad hin usa nga nagmamabidoon para han iroy niya.

¹⁵Malipayon hira ngatanan han nagkukuri ako ngan gin-alirongan ako pag-intrimis ha akon; ginbunalan ako hin mga lumalangyaw ngan ginsinuntok ako.

¹⁶Ginpaantos ako nira ngan gin-inintrimisan ako[59] nga magtarom an paniplat ha akon hin kapungot.

¹⁷Tubtob san-o, O Ginoo, an imo pagtinan-awon? Tabangi ako tikang han ira mga pag-atake; talwasa an akon kinabuhi tikang hini nga mga liyon!

¹⁸Niyan magpapasalamat ako ha imo dida ha dako nga katig-oban, magdadayaw ako ha imo ha atubangan hin damo nga mga tawo.

¹⁹Ayaw tugoti nga maghiyukat han akon kapirdehan an akon mga kaaway, adto nga mga buwaon! Ayaw tugoti nga magpakirokiro hin kalipay han akon kabidoan an mga nagdudumot ha akon hin waray ano man nga hinungdan!

²⁰Diri hira naghihimangraw hin makisasangkayon nga paagi; nagtutuha la lugod hira han ngatanan nga klase hin mga buwa hiunong han makimurayaw nga katawhan.

²¹Iginsusumbong ako nira nga naggogoliat, “Hinkit-an namon an imo ginbuhat!”

²²Kundi hinkit-an mo ini, GINOO. Sanglit, ayaw gad paghilom, O Ginoo; ayaw gad ikaw pagpahirayo!

²³Pagmata na Ginoo ngan panalipdi ako; buhat na, Dyos ko, ngan ugopi an akon katadongan.

²⁴Matadong ka, GINOO, sanglit ipahayag nga waray ko sala; Ayaw tugoti, O Dyos ko, nga manhiyukat ha akon an mga kaaway ko!

²⁵Ayaw hira tugoti nga sumiring ha ira kalugaringon, “Maupay! Natuman gud an aton karuyag.” Ayaw hira tugoti nga sumiring, “Gindaog hiya namon!”

²⁶Magupong unta ngan mapirde hin hingpit adton mga nanhihiyukat han akon pag-antos; matugob unta hin kaawod ngan kaalo adton mga napakamauruupay kay ha akon!

²⁷Gomoliat unta hin kalipay adton mga nalilipay nga natalwas ako, ngan magpadayon pagsiring, “Harangdon an GINOO; nalilipay hiya han pag-uswag han iya surugoon!”

²⁸Niyan igsasangyaw ko an imo pagkamatadong, ngan pagdadayawon ko ikaw ha bug-os nga adlaw.