Read Waray Samarenyo Meaning Based Mga Salmo 36 Bible Online

Mga Salmo 36 - Waray Samarenyo Meaning Based bible

Mga Salmo 36

¹[60] An sala nagyayakan ngadto han maraot nga tawo ha kahiladman han iya kasingkasing; sinisikway niya an Dyos ngan waray niya pagtahod ha iya.

²Tungod nga hitaas an iya paghunahuna han iya kalugaringon, naghuhunahuna hiya nga diri an Dyos mahibabaro han iya sala ngan paghuhukman ini.

³Maraot gud an iya pamulong ngan puno hin limbong diri na gud hiya nagbubuhat han matadong ngan maupay.

⁴Naglalarang hiya hin magraot nga mga larang samtang nahigda hiya; waray gud maupay nga iya ginbubuhat, ngan diri gud niya isinisikway an bisan ano nga maraot.

⁵GINOO, an imo dayuday nga paghigugma naabot ngadto ha kalangitan, an imo kamatinumanon ngadto ha panganuron.

⁶An imo pagkamatadong nananawantawan sugad han kabukiran; an imo paghukom sugad han mga kahiladman han dagat. Mga tawo ug kamanampan aada han imo pagmangno.

⁷Hin pagkamahal, O Dyos, han imo dayuday nga paghigugma! Hin-aagian namon[61] in panalipod ha ilarom han lambong han imo mga pako.

⁸Nagpapatakas kami han pagkaon nga imo gin-aandam; ginpapainom mo kami tikang han salog han imo pagkamaupay.

⁹Ikaw an surok han ngatanan nga kinabuhi, ngan tungod han imo kapawa kinikita namon an kapawa.

¹⁰Padayon hin paghigugma hadton mga nakilala ha imo ngan pagbuhat hin maupay ngadto hadton mga magtadong.

¹¹Ayaw tugoti an mga magpahitas-on hin pagsulong ha akon o palayason ako han mga magraot.

¹²Kitaa, kon diin kapukan an mga magburuhat hin maraot. Nahigda hira didto, diri na makakabangon.