Read Waray Samarenyo Meaning Based Mga Salmo 37 Bible Online

Mga Salmo 37 - Waray Samarenyo Meaning Based bible

Mga Salmo 37

¹[62] Ayaw kabaraka tungod han magraot; ayaw kaawa hadton nagbubuhat hin sayop.

²Mawawara hira dayon sugad hin banwa; mamamatay hira sugad hin mga tanom nga nalalaya.

³Sarig han GINOO ngan pagbuhat hin maupay; pag-ukoy ha tuna ngan pagpahimulos nga waray kahadlok.

⁴Pamilnga an imo kalipayan dida ha GINOO, ngan tatagan ka niya han ungara han imo kasingkasing.

⁵Ihatag han GINOO an imo kalugaringon; sarig ha iya ngan bubuligan ka;

⁶hihimoon niya an imo pagkamatadong nga sumirang sugad han naudtohan nga adlaw.

⁷Paghilom ha atubangan han GINOO; ngan paghulat hin mapailubon ha iya; ayaw kabaraka mahitungod hadton mga mainuswagon, o hadton nagpapadayon han ira magraot nga mga plano.

⁸Diri ka masina ngan ayaw kabaraka; kasamokan la an dadangatan hini.

⁹Adton nasarig han GINOO magtatag-iya han tuna, kundi an mga magraot paiiwason niya.

¹⁰Diri maiha mawawara an mga magraot; mamimiling ka ha ira kundi diri mo hira hiaagian;

¹¹kundi an mga mapinaubsanon an magtatag-iya han tuna, ngan magpapahimulos hin kauswagan ngan kalinaw.

¹²Naglalarang an maraot kontra han maupay nga tawo ngan natutuk ha iya upod an kapungot.

¹³Kundi gintataw-an la han GINOO an mga magraot, kay maaram hiya nga diri maiha mawawara hira.

¹⁴An mga magraot nahulbot han ira mga espada ngan binabawag an ira mga pana pagpatay han mga kablas ngan mga nagkikinahanglan, panmatay han mga nagbubuhat han matadong;

¹⁵kundi pamamatayon hira han ira kalugaringon nga espada, ngan magrurugtab an ira mga pana.

¹⁶An gutiay nga gintatag-iya hin maupay nga tawo labaw pa han manggad han ngatanan nga magraot,

¹⁷kay kukuhaon han GINOO an kusog han mga magraot, kundi panananalipdan niya adton mga magtadong.

¹⁸Nagmamangno an GINOO hadton mga nagsusugot ha iya, ngan maiira hin kadayonan an tuna.

¹⁹Diri hira mag-aantos kon makuri an panahon; mahuhura hira ha panahon hin katgutom.

²⁰Kundi magkakamatay an mga magraot; mawawara an mga kaaway han GINOO sugad han mga bukad ha kagurangan, mapapara hira sugad hin aso.

²¹Nautang an maraot ngan diri na gud nabayad, kundi mahinatagon an tawo nga maupay.

²²Magtatag-iya han tuna adto nga ginpakaupay han GINOO, kundi pagtatabugon adton mga ginpanhimaraot niya.

²³Nagmamando an GINOO han dalan nga pag-aagian hin usa ka tawo ngan nananalipod hadton mga nakakalipay ha iya.

²⁴Kon matumba hira, diri madadayon an ira pagkatumba, kay babangonon hira han GINOO.

²⁵Batan-on ako hadto, ngan yana tigurang na kundi waray pa gud ako kumita hin maupay nga tawo nga iginsikway han GINOO o an iya mga anak nga magpakilimos hin pagkaon.

²⁶Ha ngatanan nga panahon hiya mahinatagon ngan napautang ha iba, ngan nagigin kaupayan an iya mga anak.

²⁷Bayai an maraot ngan buhata an maupay, ngan an imo mga tulin pirme mag-uokoy ha tuna;

²⁸kay an GINOO nahigugma han matadong ngan diri nagsisikway han iya mga tawo nga matinumanon. Pinananalipdan niya hira hin dayon, kundi an mga tulin han mga magraot iya paiiwason.

²⁹An magtadong magtatag-iya han tuna ngan mag-uokoy dida hini han kadayonan.

³⁰Makinaadmanon an mga pulong hin maupay nga tawo, ngan dayuday hiya nagyayakan hin matadong.

³¹Tinitipigan niya an balaod han Dyos ha iya kasingkasing ngan diri gud niya ini binabayaan.

³²An maraot nga tawo nagbabantay hin tawo nga maupay ngan nag-iiparatay ha iya;

³³kundi diri hiya itutubyan han GINOO ngadto han gahom han iya kaaway, o pasisirotan hiya kon hiya pagdad-on ha hukmanan.

³⁴Paglaomi an GINOO ngan sugta an iya mga sugo; pasisidunggan ka niya pinaagi han imo pagtag-iya han tuna, ngan hikikit-an mo nga paiiwason an mga magraot.

³⁵Hinkilal-an ko in maraot nga tawo nga maraogdaog; nalabaw hiya pareho hin sedro ha Libano;[63]

³⁶kundi han paglabay ko[64] liwat, waray na hiya didto; ginbiling ko hiya kundi waray ko na hiya hikit-i.

³⁷Tigamni an maupay nga tawo, ngan kitaa an matadong; kay an tawo nga murayaw may-ada gud mga tulin,

³⁸kundi pagbubungkagon gud an mga makasasala, ngan pagpupuohon an ira mga tulin.

³⁹An GINOO nagtatalwas han mga magtadong ngan nananalipod ha ira ha panahon hin kakurian.

⁴⁰Binubuligan niya hira ngan tinatalwas hira; tinatalwas niya hira tikang han mga magraot; kay nadangop man hira ha iya basi panalipdan.