Read Waray Samarenyo Meaning Based Mga Salmo 38 Bible Online

Mga Salmo 38 - Waray Samarenyo Meaning Based bible

Mga Salmo 38

¹[65] O GINOO, ayaw ako siroti ha imo kasina, o kastigoha ha imo kapungot.

²Ginsamad mo ako han imo mga pana; ginbunalan mo ako.

³Tungod han imo kasina, sinasakitan gud ako; masakit gud an akon bug-os nga lawas tungod han akon mga sala.

⁴Nalulumos ako han akon mga pagtalapas; usa hira nga paras-anon nga mabug-at pagdad-on.

⁵Tungod han akon kalurongan naninimaho ngan nagdudunot an akon mga kasamdan.

⁶Nahirugmok na gud ako hin duro; nagmamabidoon ako ha bug-os nga adlaw.

⁷Hitaas hin duro an akon hiranat ngan waray gud kaupayan ha akon lawas.

⁸Kinakapoy na gud ako ngan nahirugmok na; masakit an akon kasingkasing ngan nag-aaraba ako hin kamaol-ol.

⁹O GINOO, maaram ka han akon inuungara; hinbabatian mo an ngatanan ko nga pag-araba.

¹⁰Makusog an pagputok han akon kasingkasing, nawara na an akon kusog, ngan nawad-an na hin kapawa an akon mga mata.

¹¹Diri na napahirani an akon kasangkayan ngan mga kaamyaw, tungod han akon mga kasamdan; bisan an akon panimalay napahirayo ha akon.

¹²Adton nag-iiparatay ha akon nagbubutang hin mga bitik para ha akon, ngan adton karuyag magsamad ha akon, nagtatarhog pagpukan ha akon; diri gud hira nahunong hin pagbudhi ha akon.

¹³Sugad ako hin bungol ngan diri nakakabati, sugad hin ngula ngan diri nakakayakan.

¹⁴Sugad ako hin tawo nga diri nabaton, kay diri hiya nakakabati.

¹⁵Kundi nasarig ako ha imo, O GINOO; ngan ikaw, O GINOO nga akon Dyos, an mabaton ha akon.

¹⁶Ayaw papaglipaya na akon mga kaaway kon mahitalindas ako; ayaw hira papaghamboga han akon pagkapukan!

¹⁷Harapit na gud ako mapukan ngan dayuday ako sinasakitan.

¹⁸Akon ginkukumpisal an akon mga sala; nasasamok ako tungod ha ira.

¹⁹An akon mga kaaway mag-upay an lawas ngan magkusog damo an nagdudumot ha akon hin waray la hinungdan.

²⁰Adton nabalos hin maraot tungod hin maupay nakontra ha akon kay nagtitingoha ako pagbuhat hin matadong.

²¹Ayaw ako pagpabay-i, O GINOO; ayaw pagpahirayo ha akon, O akon Dyos!

²²Buligi na ako, O Ginoo, nga akon magtaralwas!