Read Waray Samarenyo Meaning Based Mga Salmo 40 Bible Online

Mga Salmo 40 - Waray Samarenyo Meaning Based bible

Mga Salmo 40

¹[67] Duro gud an akon paghinulat han kanan GINOO tambulig; ngan namati hiya ha akon ngan nadungog an akon pagsangpit.

²Ginkuha ako niya tikang hin makaharadlok nga luong, tikang hin malapok nga buho! Ginpahimutang ako niya nga talwas na dida hin bato ngan ginparig-on ako.

³Gintutdoan ako niya pagkanta hin bag-o nga kanta, kanta hin pagdayaw ha aton Dyos. Mahahadlok in damo nga makakakita hini, ngan masarig hira han GINOO.

⁴Palaran an tawo nga nasarig han GINOO, nga diri napakadto ha mga diyosdiyos, o natampo hadton mga nagsisingba hin buwa nga mga diyos.

⁵O GINOO nga akon Dyos, ginhimo mo para ha amon in damo nga mga butang; Waray na gud mapareho ha imo! Naghimo ka hin damo nga orosahon nga mga larang para ha amon. Kon tinguhaon ko paghimangraw ha ira ngatanan, darudamo pa gud hira han akon mahisusumat.

⁶Diri ka naruruyag hin mga halad-sinunog ngan mga halad; diri ka nangangaro hin mga mananap nga ginsunog hin bug-os ha halaran, o mga halad-sinunog pagkuha hin mga sala. Gintagan mo lugod ako hin mga igdurungog pamati ha imo,

⁷sanglit binmaton ako, “Iini ako: aada ha basahan han Balaod an imo mga tugon para ha akon.[68]

⁸Hin kamaruruyagon ko pagbuhat han imo kaburut-on, O Dyos ko! Tinitipigan ko ha akon kasingkasing an imo pagturon-an.”

⁹Iginsumat ko an maupay nga sumat nga nagtatalwas ka, dida han katig-oban han ngatanan nimo nga mga tawo, O GINOO. Maaram ka nga diri gud ako mahunong pagsinumat hito.

¹⁰Waray ko pagtagoa ha akon la ngahaw an sumat han katalwasan; dayuday iginhimangraw ko an imo kamatinumanon ngan tambulig. Waray ako maghilom dida han katig-oban han ngatanan nimo nga mga tawo mahitungod han imo dayuday nga gugma ngan kamaunongon.

¹¹Maaram ako nga diri ka gud mahunong hin kamaloloy-on ha akon, O GINOO! Pirme mananalipod ha akon an imo gugma ngan kamaunongon.

¹²Ginpapalibotan ako hin damo nga mga kakurian nga diri gud maiihap! Hin-abtan ako han akon mga sala, ngan diri na gud ako nakakakita; labaw pa hira kadamo han mga buhok han akon ulo, ngan nawad-an ako han akon kaisog.

¹³Talwasa ako, O GINOO! Buligi ako yana!

¹⁴Magupong unta ngan mapirde hin hingpit adton mga nagtitinguha hin pag-iparatay ha akon. Magbalik unta ngan maalohan adton mga nalilipay tungod han akon mga kakurian!

¹⁵Manluya unta tungod han ira kapirdehan adton mga nag-iinintrimis ha akon!

¹⁶Magrayhak ngan magmalipayon unta an ngatanan nga nadangop ha imo! Dayuday sumiring unta an ngatanan nga nahigugma han imo katalwasan, “Hin pagkadako gud han GINOO!”

¹⁷Maluya ako ngan waray gud nahihimo, kundi ginhuhunahuna mo ako, O Ginoo. Ikaw an akon parabulig ngan magtaralwas— ayaw na paglangan, O Dyos ko!