Read Waray Samarenyo Meaning Based Mga Salmo 41 Bible Online

Mga Salmo 41 - Waray Samarenyo Meaning Based bible

Mga Salmo 41

¹[69] Pagkapalaran gud hadton mga tawo nga may'da pagpaid hadton mga pobre; kay bubuligan man hira han GINOO ha takna nga hira amo na'n magkuri.

²Pananalipdan gud han GINOO hira ngan titipigan an kinabuhi nira, pagpapakaupayon dinhe ha tuna, kahulog ha ira kaaway diri na.

³Han GINOO hira manta bubuligan ha takna nga may'da ira balatian; ira mga sakit iya tatambalon, maupay panlawas pahiuulion.

⁴Siring ko, “GINOO, ako nakasala, malooy ka ha ak' ngan ako tambala.”

⁵Mga kaaway ko ak' ginyuyubitan. Buot nira ak' mamatay, hingalimtan.

⁶Diri tangkod adton naduaw ha akon, pagtirok la hin ha akon igsususon. Katapos nalakat ngan igsinumaton ha tanan nga dapit hin waray paghunong.

⁷Naghuhoringhoring hiunong ha akon an tanan nga ha akon madinumtanon; ira ginlalarang, ginpapamalandong an giraraoti nga para[70] ha akon.

⁸Siring nira, “Hiya grabi masakiton, ha iya higdaan diri na mabangon.”

⁹Suok gud nga sangkay kinmontra ha akon, an ak' sinarigan, saro ha pagkaon.

¹⁰Kalooyi gadman ako, O GINOO, pabalika maupay nga panlawas ko. Pabalika basi ako makahimo, hin pagbulos hadton mga kaaway ko.

¹¹Kalipay mo ha ak' ako masasayod, kay ha akon diri hira madadaog.

¹²Im' ak' bubuligan kay ako matadong. Im' pagbantay ha akon magpapadayon.

¹³Sanglit an GINOO amo'n pagdayawon, hiya nga Dyos han Israel ha gihapon! Pagdayawon hiya yana nga panahon, ngan ha kadayonan unta pagtumanon!