Read Waray Samarenyo Meaning Based Mga Salmo 42 Bible Online

Mga Salmo 42 - Waray Samarenyo Meaning Based bible

Mga Salmo 42

¹[71] Sugad hin bugsok nga inuuhaw hin mahagkot nga tubig, inuuhaw man ako ha imo, O Dyos.

²Inuuhaw ako ha imo, an buhi nga Dyos. San-o ako kakadto ngan pagsisingba ha imo atubangan?

³Adlaw gab-i nagtatangis ako, ngan an mga luha amo la an akon pagkaon; ha dayuday napakiana ha akon an akon mga kaaway, “Hain man an imo Dyos?”

⁴Masakit an akon kasingkasing kon akon hinnunumduman an naglabay nga panahon, han akon pagbunyog han kadam-an ngadto ha balay han Dyos, ngan ginmandoan hira samtang nagkakalakat, usa nga hugpo nga malipayon, nga nagkakaranta ngan naggogogliat hin mga pagdayaw ngadto han Dyos.

⁵Kay ano nga masulob-on man ako? Kay ano nga nasasamok ako? Maglalaom ako han Dyos, ngan ha makausa pa pagdadayawon ko hiya, akon magtaralwas ngan akon Dyos.

⁶Mabug-on an akon kasingkasing dinhe ha akon pagkabihag, sanglit nahinunumdom ako ha iya. Ginpadad-an niya hin mga balod hin kabidoon an akon kalag; nagngungurob ha akon an mga pagkasamok pareho hin baha, pareho hin mga busay nga nagbubuhos ngadto han Jordan tikang ha Bukid Hermon ngan Bukid Mizar.

⁸Ipakita unta han GINOO an iya dayuday nga paghigugma ha adlaw basi makagkanta ako ha gab-i, pag-ampo ngadto han Dyos han akon kinabuhi.

⁹Nasiring ako ha Dyos nga akon mananalipod, “Kay ano in paghingalimti mo ha akon? Kay ano nga magpapadayon hin pag-antos han kabangis han akon mga kaaway?”

¹⁰Gindudugmok ako han ira mga pagtamay; samtang nagpipinakiana hira ha akon, “Hain an imo Dyos?”

¹¹Kay ano nga masulob-on man ako? Kay ano nga nasasamok man ako? Maglalaom ako han Dyos, ngan ha makausa pa pagdadayawon ko hiya akon magtaralwas ngan akon Dyos.