Read Waray Samarenyo Meaning Based Mga Salmo 44 Bible Online

Mga Salmo 44 - Waray Samarenyo Meaning Based bible

Mga Salmo 44

¹[73] Hinbatian han amon mga talinga, O Dyos, ginsumatan kami han amon mga ginikanan, hiunong han dagko nga mga butang nga imo ginbuhat ha ira panahon, han kamaihaan na nga mga adlaw.

²Kon ginpaunan-o mo pagtabog han kanasoran ngan iginpahimutang mo an imo mga tawo dida han ira tuna; kon ginpaunan-o mo pagkastigo han iba nga mga nasod ngan pagpauswag mo han imo kalugaringon nga mga tawo.

³Waray pagdag-a han imo mga tawo an tuna pinaagi han ira mga espada; diri pinaagi han ira gahom an ira pagdarag-an; kundi pinaagi ini han imo gahom ngan imo kusog, pinaagi han pagpatapod nimo nga aada ka ha ira, nga nagpakita nga imo hira ginhigugma.

⁴Ikaw an akon hadi ngan akon Dyos; ginpapadaog mo[74] an imo mga tawo,

⁵ngan pinaagi han imo gahom ginpupukan namon an amon mga kaaway.

⁶Diri ako nasarig han akon pana o han akon espada hin pagtalwas ha akon;

⁷kundi gintalwas mo kami han amon mga kaaway ngan gindaog mo adton mga nagdudumot ha amon.

⁸Pagdadayawon ka namon ha gihapon ngan pagpapasalamatan ka namon hin dayon.

⁹Kundi yana iginsikway mo kami ngan imo iginpapirde; diri ka na nabunyog han amon kasondalohan.

¹⁰Ginpadalagan mo kami han amon mga kaaway, ngan gintikasan kami nira.

¹¹Iginpaihaw mo kami sugad hin mga karnero; ginpasarang mo kami ha langyaw nga kanasoran.

¹²Iginbaligya mo an imo mga tawo hin barato la nga palit daw sugad hin gutiay gudla an ira kapulsanan.[75]

¹³Hinkikit-an han amon mga amyaw an ginbuhat mo ha amon, ngan ginyuyubitan ug gintataw-an la nira kami.

¹⁴Ginhimo mo kami nga suronlugon la dida han mga nasod; usa nga pataraw-an han mga tawo.

¹⁵Aada ako pirme ha kaarawdan; napuputos ako hin kaalo

¹⁶ha pagpinamati han mga pagsunlog ngan mga pagtamay han akon mga kaaway ngan hadton mga nagdudumot ha akon.

¹⁷Ngatanan ini nanhinabo ha amon, bisan kon waray kami mahingalimot ha imo o waray magtuman han ginsabotan nga imo ginhimo ha amon.

¹⁸Waray kami maglingo ha imo waray namon pagsupaka an imo mga sugo.

¹⁹Kundi ginbayaan mo kami nga waray mahihimo dida han ihalas nga kamanampan; ginpabay-an mo la kami ha dako nga kasisidman.

²⁰Kon hinmunong kami pagsingba han amon Dyos ngan nag-ampo ngadto hin langyaw nga diyos,

²¹hinbabaroan manta nimo ini, kay maaram ka han amon sekreto nga mga panhunahuna.

²²Kundi tungod ha imo ginpapatay kami ha bug-os nga adlaw, gin-iisip kami sugad hin mga karnero nga irihawon.

²³Pagmata, O Ginoo! Kay ano nga nakaturog ka? Bangon! Ayaw kami igsikway hin dayon!

²⁴Kay ano nga natago ka ha amon? Ayaw hingalimti an amon pag-antos ngan kasakitan!

²⁵Napukan kami ngan nahirugmok ha tuna; nalunay kami ha tapotapo.

²⁶Buhat ngan buligi kami! Tungod han imo dayuday nga paghigugma, talwasa kami!