Read Waray Samarenyo Meaning Based Mga Salmo 45 Bible Online

Mga Salmo 45 - Waray Samarenyo Meaning Based bible

Mga Salmo 45

¹[76] Maghusay nga pulong ha akon nagpuno, samtang para'n hadi ak' nagkukumpuso; Pareho han pluma ini nga dila ko, hin magsusurat nga duro hin ka listo.

²Ha tanan nga mga gin-anak hin tawo, ikaw gud an labaw ha ira ka gwapo; tin-aw ka mamulong listo magdiskurso, ginpakaupay ka pirme han GINOO.

³Itaod na yana an imo espada, itaklos ha hawak, hadi nga kusgan ka; ikaw naghahadi gamhanan ha tuna, talahoron ka gud ngan harangdon ka pa!

⁴Ha kaharangdon sulong ha pagdarag-an, an matuod, matadong[77] imo ugopan; pagpapadag-on ka han imo kakusgan, dagko'ng pagdarag-an maimo ngatanan.

⁵Imo mga pana duro'n kamag-idlot, ha kasingkasing han kaaway nadulot, mga nasod nahuhulog ha im' kamot, ha imo tiilan hira nagsusugot.

⁶An trono nga han Dyos ginhatag ha imo,[78] magpapabilin hin kadayonan ito; matadong ka maghadi'n ginhadian mo.

⁷Mahal mo'n matadong, maraot kontra mo. Sanglit tungod hito an Dyos nga Dyos nimo, ha imo nagpili, nagdihog ha imo. Igin-ipis ha im' kalipay nga damo, labaw hadton iba nga bisan pa hin-o.

⁸Mga panapton mo maghamot ngatanan, nga han mira, aloy, kasya binutangan; palasyo nga marpil an tinitikangan han mga turunggon nga im' kaliawan.

⁹Tampo han im' korte han kababayen-an, didto'n mga anak hadton kahadian; rayna ha im' tuo rinayan-dayanan, han gimamahali nga mga bulawan.

¹⁰Karaslon han hadi, ako pamatii, katawhan, kauropdan mo hingalimti:

¹¹Kahusay mo uungaraon han hadi, hiya'n agaron mo, hiya an yukboi.

¹²Adton katawhan nga mga taga-Tiro, magdadara ha im' hin mga rigalo; ngan adton katawhan nga riko hin duro, magtitinguha pakigsangkay ha imo.

¹³Adton prinsisa aadto ha palasyo, rinayan-dayanan, kahusay hin duro! bulawan an borda hadton iya bado,

¹⁴an iya panapton may kolor nga damo. Ngadto gud han hadi hiya ginbunyogan, ginsusunod han iya kadaragan-an; bunyog hira niya nga ginpasidunggan ngan gindara liwat hira ha hadi man.

¹⁵Upod adton rayhak ngan an kalipayan, upod an kalipay ngan rayhak han tanan; hira naabot ngatanan minandoan palasyo han hadi ira sinusudlan.

¹⁶O Hadi ko, magdamo'n im' kabataan, pagliwan han imo mga ginikanan; ikaw maghihimo ha ira ngatanan, han bug-os nga tuna, nga mga punoan.

¹⁷An bantog mo mabubuhi na hin dayon, tungod hinin kompuso nga karantahon; ha tanan nga tiarabot nga panahon, han ngatanan ikaw na'n pagdadayawon.