Read Waray Samarenyo Meaning Based Mga Salmo 47 Bible Online

Mga Salmo 47 - Waray Samarenyo Meaning Based bible

Mga Salmo 47

¹[80] Pamakpak na kamo nga may kalipayan, kamo ngatanan gud nga mga katawhan; hin pagdayaw an Dyos iyo goliatan, hin dagko nga tingog iyo pagkantahan.

²An GINOO angay niyo kahadlokan, an Dyos nga Gilalabawi han Ngatanan. Hiya amo an hadi nga dako gudman, nga nagkahadi han bug-os kalibutan.

³Iya kita gintagan hin pagdarag-an, kontra hin damo gud nga mga katawhan; ngan iya ha aton nga ginpahadian, adton damo hin duro nga kanasoran.

⁴Hiya an nagpili hin para ha aton, hadton tuna nga aton gud panurundon; ini an tuna nga pagtatag-iyahon, hadton katawhan nga iya higugmaon.

⁵Napakadto na an Dyos han iya trono, may mga gogliat hin kalipay didto, ngan may-ada mga pagtrompeta'n dagko, samtang nasaka na adto nga GINOO.

⁶Pagkanta ngadto ha Dyos hin malipayon, pagkanta hin pagdayaw ha hadi naton.

⁷Hadi'n Dyos han tanan nga kalibutanon, pagdayawa hiya'n mga karantahon!

⁸Nalingkod adton Dyos nga amo'n GINOO, didto hadton iya baraan nga trono; ngan iya ginhahadian tikang didto, an ngatanan nga kanasoran hin tawo.

⁹Natim-os kahadian han kanasoran, upod han katawhan[81] han Dyos ni Abraham. Labaw kagamhanan han kasondalohan, naghahadi hiya labaw han ngatanan.