Read Waray Samarenyo Meaning Based Mga Salmo 50 Bible Online

Mga Salmo 50 - Waray Samarenyo Meaning Based bible

Mga Salmo 50

¹[88] Nagyayakan an GINOO, an Dyos nga Labi Kamakagarahum; gintatawag niya an bug-os nga tuna tikang ha sinirangan ngadto ha katundan.

²Nasanag an Dyos tikang ha Sion; an syudad hingpit han iya katahom.

³Tiarabot an aton Dyos, kundi diri ha kahilom; ha atubangan niya may naglalahimgad nga kalayo, ha palibot niya may makusog nga bagyo.

⁴Gintatawag niya an langit ug tuna sugad nga mga saksi han iya paghukom han iya mga tawo.

⁵Nasiring hiya, “Pagtiroka an akon magtinumanon nga mga tawo, adton naghimo hin ginsabotan kaupod ha akon pinaagi hin paghalad hin tinubod nga mga unong.”

⁶Nagsasangyaw an kalangitan nga matadong an Dyos, nga hiya ngahaw usa nga maghurukom.

⁷“Pamati, o akon mga tawo, ngan magyayakan ako; magpapamatuod ako kontra ha imo, Israel. Amo ako an Dyos nga iyo Dyos.

⁸Diri ako nagsasaway ha iyo tungod han iyo mga tinubod nga unong, ngan han mga tinubod nga halad nga ha dayuday iyo gindadara ha akon.

⁹Diri ako nagkikinahanglan hin mga todo nga baka tikang han iyo kaumhan o kakandingan tikang han iyo mga panon;

¹⁰kay akon man an ngatanan nga kamanampan ha kagurangan pati an kabakahan ha yinukot nga kapungtoran.

¹¹Akon an ngatanan nga katamsihan ha kalangitan, ngan an ngatanan nga buhi nga mga binuhat ha kaumhan.

¹²“Kon gutomon ako, diri ko ikaw pagsusumatan, kay an kalibutan ngan an ngatanan nga aada hini, akon man.

¹³Nakaon ba ako han karne hin kabakahan o mainom han dugo hin kakandingan?

¹⁴An pagpasalamat asay ighalad niyo ngadto ha Dyos,[89] ngan ihatag han Labi Kamakagarahum an iyo iginsaad.

¹⁵Tawaga ako niyo kon naabot an kakurian; tatalwason ko kamo, ngan pagdadayawon ako niyo.”

¹⁶Kundi nasiring an Dyos ngadto han mga magraot, “Kay ano nga ginpapamatbat niyo an akon mga sugo? Kay ano nga ginhihimangraw niyo an akon ginsaaran?

¹⁷Nadiri kamo nga pagsawayan ko kamo; iginsisikway niyo an akon mga sugo.

¹⁸Nakikigsangkay kamo han kawatan nga iyo hinkikit-an, ngan nakikigtampo kamo hin mga manlilibog.

¹⁹“Andam kamo pirme pagyakan hin maraot; diri kamo nag-aalang hin pagbuwa.

²⁰Andam kamo pagsumbong han iyo kalugaringon nga kabugtoan ngan pagpangita hin ira kasaypanan.

²¹Ginbuhat niyo ini ngatanan ngan waray la ako magyakan, sanglit naghunahuna kamo nga pareho la ako ha iyo. Kundi yana ginsasaway ko kamo ngan nagsusumbong ako ha atubangan niyo.

²²“Pamatii ini niyo, kamo nga nagpapasibaya ha akon, kay kon diri, bubungkagon ko kamo, ngan waray gud makakatalwas ha iyo.

²³An pagpasalamat amo an tinubod nga unong nga nagpapasidungog ha akon, ngan tatalwason ko gud an ngatanan nga nagsusugot ha akon.”