Read Waray Samarenyo Meaning Based Mga Salmo 52 Bible Online

Mga Salmo 52 - Waray Samarenyo Meaning Based bible

Mga Salmo 52

¹[92] Kay ano nga ipinaparayaw mo an imo karat-an, kusgan nga tawo? Dayon an kanan Dyos kamatinumanon.

²Naglalarang ka ha bug-os nga adlaw ha pagdaot hin iba nga mga tawo; pareho hin matarom nga labaha an imo dila. Dayuday ka naghihinimohimo hin mga buwa.

³Hinihigugma mo an maraot labaw han maupay ngan an pagbuwa labaw han kamatuoran.

⁴Naruruyag ka hin pagdaot hin mga tawo pinaagi han imo mga pulong, ikaw nga buwaon!

⁵Sanglit pupukanon ka ha kadayonan han Dyos; kakaptan ka niya ngan aagawon ka tikang han imo balay; kukuhaon ka niya tikang han kalibutan han mga buhi.

⁶Hikikit-an ini han magtadong nga mga tawo ngan mahahadlok hira; niyan pagtataw-an ka nira ngan masiring,

⁷“Kitaa, iini in tawo nga waray tumapod han Dyos sugad nga iya arayopan, kundi sinmarig la lugod han iya dako nga karikohan ngan nangita hin karig-onan dida han iya pagkamaraot.”

⁸Kundi sugad ako hin kahoy nga olibo nga naturok ha balay han Dyos. Nasarig ako han iya dayuday nga paghigugma hin kadayonan.

⁹Dayuday pasasalamatan ko ikaw, Dyos, tungod han imo ginbuhat; ha atubangan han imo mga tawo igsasangyaw ko an imo pagkamaupay.