Read Waray Samarenyo Meaning Based Mga Salmo 55 Bible Online

Mga Salmo 55 - Waray Samarenyo Meaning Based bible

Mga Salmo 55

¹[95] O Dyos, pamatii an akon pag-ampo; ayaw gad pagtalikdi an akon pangaraba!

²Pamatii ngan batona ako; ginuguol gud ako han akon mga kabaraka.

³Naaringit ako han mga panarhog han akon mga kaaway, han pagtalumpigos han mga magraot. Nagsasamok hira ha akon; nasisina ngan nagdudumot hira ha akon.

⁴Nahahadlok gud an akon kasingkasing, ngan binubug-atan ako han mga kangirhat han kamatayon.

⁵Inaalpan ako hin kahadlok ngan pangurog; dinadaog ako hin duro nga kahadlok.

⁶Nasiring ako, “Kon may-ada ko pa unta mga pako, pareho hin sarapati! Malupad gud ako ngan mamimiling hin papahuwayan!

⁷Malupad ako hin hirayo hin duro ngan mag-uokoy ako ha kamingawan.

⁸Magdadagmit ako pamiling hin taragoan tikang han namimintas nga unos ngan han bagyo.”

⁹Laglaga hira, O Ginoo, ngan guponga an ira pamulong! Nakita ako hin pagraogdaog ngan karibokan ha syudad.

¹⁰Naglilibot hira han syudad adlaw gab-i ha bawbaw han mga pader hito; puno ito hin karat-an ngan kakurian.

¹¹May kabungkagan ha ngatanan nga dapit; puno hin pagtalumpigos ngan paglimbong an kakalsadahan.

¹²Maiilob ko ito kon kaaway ito nga nag-iintrimis ha akon; makakatago ako tikang ha iya kon kaaway ito nga naghihinambog ha akon.

¹³Kundi ikaw man ngay-an nga akon kaupod-upod, kausa ko ngan suok nga sangkay!

¹⁴Nagkaada kita suok nga paghimangraway ngan binmunyog kita han mga tawo ngadto ha templo.

¹⁵Umabot unta dayon ha akon mga kaaway an kamatayon; mahingadto unta hira nga buhi pa ha tuna han mga patay! Aada an karat-an ha ira mga puroy-anan ngan ha ira mga kasingkasing.

¹⁶Kundi nakikibulig ako han GINOO nga Dyos, ngan tatalwason ako niya.

¹⁷Napaigbaw ngadto ha iya ha aga, udto, ngan gab-i an akon mga sumbong ngan mga araba, ngan mamamati hiya han akon tingog.

¹⁸Pababalikon niya ako nga talwas tikang han mga araway nga akon inaasdang kontra hin damo hin duro nga mga kaaway.

¹⁹Mamamati ha akon ngan pipirdehon hira han Dyos nga naghadi tikang pa gud ha tinikangan; waray nira mahihimo mahitungod hito, kay diri man hira nahahadlok ha iya.

²⁰Gin-atake an iya kasangkayan han akon kaupod-upod hadto anay; waray tumana an iya saad.

²¹Madarudalunot pa hin mantikilya an iya mga pulong, kundi may niya pagdumot ha iya kasingkasing. Sugad hin lana kadalunot an iya mga pulong, kundi nakakasamad hira pareho hin magtarom nga mga espada.

²²Itubyan ha GINOO an imo mga kakurian, ngan sasapnayon ka niya; diri gud hiya matugot nga mapirde an maupay nga tawo.

²³Kundi ilalabog mo, O Dyos, ngadto ha mga kahiladman ha ubos, adton mga parapamatay ngan mga buwaon, ha diri pa nagkakatunga an ira kinabuhi. An para ha akon, masarig ako ha imo.