Read Waray Samarenyo Meaning Based Mga Salmo 56 Bible Online

Mga Salmo 56 - Waray Samarenyo Meaning Based bible

Mga Salmo 56

¹[96] Kalooyi ako, O Dyos, kay gin-aatake ako; gintitimaraot ako han akon mga kaaway ha ngatanan nga panahon!

²Gin-aatake ako han akon mga kaaway ha bug-os nga adlaw. Damo hin duro an nakikiaway ha akon.

³Nasarig ako ha imo, kon nahahadlok ako, O Gilalabawi.

⁴Nasarig ako han Dyos ngan nagdadayaw han iya saad; nasarig ako ha iya, ngan diri ako mahahadlok. Ano in mabubuhat ha akon hin tawo la?

⁵Ginpapakurian ako han akon mga kaaway han ngatanan nga akon binubuhat; pirme la hira naghuhunahuna kon uunanhon nira paghibang ha akon!

⁶Nagtitirok hira dida hin taragoan nga lugar ngan gin-iininaw an ngatanan nga akon binubuhat, ngan naglalaom pag-iparatay ha akon.

⁷Hampaka[97] hira, O Dyos, tungod han ira karat-an; dag-a han imo kasina ini nga mga tawo!

⁸Sayod ka han akon kakurian; imo iginlista an akon mga luha. Diri ba hira listado ha imo basahan?

⁹Mangingisol an akon mga kaaway ha adlaw nga magtawag ako ha imo. Maaram ako hini kay dapig ha akon an Dyos![98]

¹⁰Nasarig ako han Dyos ngan nagdadayaw han iya saad; pagdadayawon ko an saad han GINOO.

¹¹Nasarig ako ha iya, ngan diri ako mahahadlok. Ano in mabubuhat ha akon hin tawo la?

¹²O Dyos, ihahalad ko ha imo an akon iginsaad; ihahatag ko ha imo an akon halad hin pagdayaw,

¹³kay gintalwas mo ako tikang han kamatayon ngan tikang hin pagkapirde. Sanglit naglalakat ako ha atubangan han Dyos, dida han kapawa nga nalamrag han mga buhi.