Read Waray Samarenyo Meaning Based Mga Salmo 57 Bible Online

Mga Salmo 57 - Waray Samarenyo Meaning Based bible

Mga Salmo 57

¹[99] Kalooyi ako, O Dyos, kalooyi ako, kay nadangop ako ha imo nga matalwas. Nakakaagi ako hin panalipod ha lambong han imo mga pako, tubtob nga lumabay an ngatanan nga kataragman.

²Nagtatawag ako han Dyos, an Gilalabawi, han Dyos nga nahatag han ngatanan nga akon mga kinahanglanon.

³Mabaton hiya tikang ha langit ngan tatalwason ako; dadag-on niya an mga paraatake ha akon. Ipapakita ha akon han Dyos an iya dayuday nga paghigugma ngan pagkamatinumanon.

⁴Nahigda ako ha butnga hin mga liyon, nga andam pagbanghag hin mga tawo. Sugad hin mga bangkaw ngan mga pana an ira mga ngipon; sugad hin magtarom nga mga espada an ira mga dila.

⁵Ipakita ha langit an imo pagkaharangdon, O Dyos, ngan ha bug-os nga tuna an imo kadungganan!

⁶Nagbitad hin pukot pagdakop ha akon an akon mga kaaway; dinadaog ako hin kabaraka. Nagluong hira ha akon aragian, kundi hira la ngahaw an nagkahuglog ngadto hito.

⁷Andam na ako, O Dyos; andam na gud ako! Magkakanta ngan magdadayaw ako ha imo!

⁸Pagmata na, kalag ko! Pagmata na, arpa ngan salteryo ko! Pupukawon ko an adlaw!

⁹Pasasalamatan ko ikaw ha butnga han mga nasod, O Ginoo! Pagdadayawon ko ikaw ha butnga han mga katawhan!

¹⁰Naabot ha langit an imo dayuday nga paghigugma, ngan ha mga panganoron an imo kamatinumanon.

¹¹Ipakita ha langit an imo kaharangdon, O Dyos, ngan ha bug-os nga tuna an imo kadungganan!