Read Waray Samarenyo Meaning Based Mga Salmo 58 Bible Online

Mga Salmo 58 - Waray Samarenyo Meaning Based bible

Mga Salmo 58

¹[100] Nahatag ba kamo hin matadong nga paghukom, kamo nga mga punoan?[101] Naghuhukom ba kamo hin matadong han ngatanan nga mga tawo?

²Diri! Naghuhunahuna la kamo han maraot nga iyo mabubuhat, ngan ginhihimo niyo in mga panlupig ha tuna.

³Nagsisinayop an magraot nga mga tawo ha bug-os nira nga kinabuhi; nagbibinuwa hira tikang gud han ira katawo.

⁴Puno hira hin hilo sugad hin mga halas; sinasagpo nira an ira mga talinga sugad hin mga bungol nga ibingan,

⁵nga diri hinbabatian an tingog han mga maglulumay hin mga halas, o an ginyayakan han listo nga salamangkero.

⁶Pusaka an mga ngipon hini nga magpintas nga mga liyon, O Dyos.

⁷Mawara unta hira pareho hin tubig nga nag-iinawas; madugmok unta hira sugad hin mga banwa dida ha agianan.[102]

⁸Mapareho unta hira hin mga suso nga natutunaw ngadto hin pagka apog; masugad unta hira hin minasus-an nga natawo nga patay nga diri na gud makita han kapawa.

⁹Ha diri pa nira hinbabaroan ini, gingagarab hira sugad hin mga banwa; ha iya mapintas nga kasina hinuhuyop hira han Dyos samtang mga buhi pa hira.[103]

¹⁰Malilipay an mga magtadong kon hinkikit-an nira nga kinakastigo an mga makasasala; pagtatamakan nira an dugo han mga magraot.

¹¹Masiring an mga tawo: “Binabalos manggod an mga magtadong; may-ada gud man Dyos nga naghuhukom han kalibutan!”