Read Waray Samarenyo Meaning Based Mga Salmo 6 Bible Online

Mga Salmo 6 - Waray Samarenyo Meaning Based bible

Mga Salmo 6

¹[8] GINOO, ayaw ha akon pagdumot ug kasina! Ha imo kapungot, ayaw ako pagkastigoha!

²Kalooyi ako nga tugob hin kaluya, GINOO. Tagi ako hin kusog, kapoy na ako hin duro.

³An bug-os ko nga kinabuhi, lonlon kasakitan. Maiha pa ba, GINOO, an imo ha akon pagtabang?

⁴Pakadi, GINOO, ngan ako talwasa; ha imo kalooy, ha kamatayon ako bawia.

⁵Hingangalimtan ka ha tuna han mga patay; an mga pagdayaw ha imo waray.

⁶Maluya na ako tungod han kabidoan, Kada gab-i mahulos an akon higdaan; hamog na hin mga luha an akon ulonan, tungod han pagtangis nga diri kapupudngan.

⁷Makuri na an akon pagkita, kay nanhuhupong na an akon mga mata, han pagtinangis nga waray na hunong, buhat ha akon han mga kaaway nakon.

⁸Pahirayo ha akon, kamo nga nagbuhat hin karat-an. An akon pagtangis, han GINOO pinamatian;

⁹nabaton hiya han akon pangaro hin pakitabang; ngan an akon pag-ampo dayuday pinamamatian.

¹⁰An akon mga kaaway masabot han mapait nga kaalo, han pagkakawang han ira mga paniguro; magkakasaramok hira ngan mangangalagiw.