Read Waray Samarenyo Meaning Based Mga Salmo 60 Bible Online

Mga Salmo 60 - Waray Samarenyo Meaning Based bible

Mga Salmo 60

¹[105] Iginsalikway mo kami, O Dyos, ngan ginpirde mo kami; nasinahan mo kami—kundi yana balik gad ha amon.[106]

²Ginpakurog mo an tuna, ngan gin-abrehan mo ini; yana pagbulnga an mga kasamdan hini kay nagbuburublag na.

³Ginpaantos mo hin duro an imo mga tawo; ginpainom mo kami hin bino nga nakapariigdiig ha amon.

⁴Ginpahimatngan mo adton may pagtahod ha imo basi makalikay hira han kabungkagan.

⁵Talwasa kami pinaagi han imo kusog; batona an amon pag-ampo basi matalwas an mga tawo nga imo hinihigugma.

⁶Ha iya dapit nga baraan[107] nagyakan an Dyos, “Ha kadaogan pagbabahinon ko an Siquem ngan ighahatag ko an Patag Sucot ha akon mga tawo.

⁷An Galaad akon, sugad man an Manases; an Efraim an akon helmet ngan an Juda an tigaman han akon pagburut-an.

⁸Kundi gagamiton ko an Moab nga akon palanggana ngan ipipilak ko ha Edumea an akon sandalyas, sugad nga tigaman nga gintatag-iya ko ini. Uunanhon han Filistia paggoliat nga nakadaog hiya ha akon?”

⁹Hin-o, O Dyos, an magdadara ha akon ngadto han pinadig-on nga syudad? Hin-o an magmamando ha akon ngadto ha Edumea?

¹⁰Iginsikway ba kami nimo hin tinuod? Diri ka ba mabunyog han amon kasondalohan?

¹¹Buligi kami kontra han kaaway, kay waray la pulos an bulig han tawo.

¹²Kon dapig ha amon an Dyos magdadaog kami; pipirdehon niya an amon mga kaaway.