Read Waray Samarenyo Meaning Based Mga Salmo 62 Bible Online

Mga Salmo 62 - Waray Samarenyo Meaning Based bible

Mga Salmo 62

¹[109] An Dyos gudla an akon gintataporan, natikang ha iya an ak' katalwasan.

²Hiya'n panalipod, magtaralwas nakon, akon salipdanan, di' ak' pipirdehon.

³Tubtob pa gud san-o nga kamo ngatanan magsulong hin tawo, ha iya paghibang; nga diri ngani an iya kamakusog masugad hin alad nga nahihirugmok?

⁴Karuyag la niyo, iyo ginlalarang, amo gudla adton ha iya pagpukan; tikang han iya mga pagkadungganan, mga buwa an iyo nalilipayan. Matuod daw mga pakaupay gudman, adton mga pulong' iyo ginyayakan; kundi ha salad han iyo mga dughan, mga panhimaraot an iyo larang.

⁵An Dyos gudla an akon gintataporan, hiya gudla an akon ginlalaoman.

⁶Hiya'n ak' magtaralwas ngan salipdanan, kabulig ko hiya, w'ray ko kapirdehan.

⁷An Dyos amo an akon sinasarigan, han akon katalwasan ngan kadungganan. Hiya an ak' mananalipod nga kusgan, amo hiya an akon gud salipdanan.

⁸Katawhan ko, an Dyos amo an sarigan, ha ngatanan nga mga kapanahonan; sumati han tanan mo nga kakurian, kay amo man hiya'n aton arayopan.

⁹Tanan tawo daw hin us' la nga ginhawa, magin dako, gutiay w'ray balor hira; kon imo timbangon magaanay gudla magarugaan pa kay hin gininhawa.

¹⁰Ayaw pagsarigi an pagraogdaog, ayaw pagriko hin panikas, panlupog; bisan an im' kariko magdugang na gud, ayaw dida igsandig an im' pagtapod.

¹¹Di' la makausa nga Dyos an nagyakan, di' la makausa nga ak' hinbatian; siring niya nga iya an kagamhanan

¹²ngan an iya gugma nagpapadayon man. Ikaw ngahaw an nagbabalos, Ginoo, han ngatanan ngan tagsatagsa ka tawo; an im' pagbalos iginbabasar nimo, sumala han tanan nga ira nahimo.