Read Waray Samarenyo Meaning Based Mga Salmo 63 Bible Online

Mga Salmo 63 - Waray Samarenyo Meaning Based bible

Mga Salmo 63

¹[110] O Dyos, ikaw amo gudla an Dyos nakon, ngan pirme ko ikaw nga pangangandoyon; ngan an bug-os gud nga pagkatawo nakon, nag-uungara ha imo hin padayon. Kauhaw han kalag ko para ha imo, sugad hin tuna nga uga na hin duro; nga waray gud tubig bis' usa ka turo, akon unod nangangandoy gud ha imo.

²Sanglit pakitaa gudman ak' ha imo, didto hadton ruwang hadton imo Templo; pakitaa ako kon matiunan-o, an pagkagamhanan, pagkaharangdon mo.

³Kay han kinabuhi mauruupay pa, adton imo dayuday nga paghigugma; sanglit akon mga im-im nagkakanta, ngan akon gudman nga pagdadayawon ka.

⁴Magpapasalamat gud ako ha imo, samtang nga iini ngan buhi pa ako; akon mga kamot aalsahon ngadto, ngadto ha imo para gud hin pag-ampo.

⁵Akon kalag akon gud pakakaonon, ngan mabusog ini ngan di' na gutomon; ngan magkakanta gud ak' hin malipayon, pagdayaw ha imo an ak' kakantahon.

⁶Ikaw an akon gud nahinunumduman, ha akon paghigda ha akon higdaan; ha bug-os nga gab-i ginpipinanumdom,

⁷kay dayuday nagin kabulig ka nakon. Tungod hin kalipay ako nagkakanta, ha lambong han imo mga pako manta.

⁸Ha imo an akon kalag pahangkopa, tuo mo nga kamot ha ak' patalwasa.

⁹Ha tuna han mga patay pakadtoon, adton may tinguha pagpatay ha akon.

¹⁰Dit' ha pag-awayan hira pagpatayon, hin mga lubo ira lawas kaonon.

¹¹Tungod han Dyos an hadi malilipay man, tungod nga gintagan hiya'n pagdarag-an. Tanan nga nagsusumpa ha iya ngaran, kundi baba nga buwaon pagtatakpan.