Read Waray Samarenyo Meaning Based Mga Salmo 64 Bible Online

Mga Salmo 64 - Waray Samarenyo Meaning Based bible

Mga Salmo 64

¹[111] Nagkukuri ako, O Dyos, pamatii an akon pag-ampo! Nahahadlok ako—talwasa ako tikang ha akon mga kaaway!

²Panalipdi ako tikang han malingoon nga mga larang han mga magraot, tikang hin magsamok nga mga hugpo hin magraot nga mga tawo.

³Ginbabaid nira sugad hin mga espada an ira mga dila, ngan ihinihimunta sugad hin mga pana in magpait nga mga pulong.

⁴Nagama hira pagpana han mag-upay nga mga tawo; natigda hira pagpana, ngan diri nahahadlok.

⁵Nag-iinaghatay hira han ira magraot ngan malingoon nga mga larang; nagsasarabot hira kon diin nira ibubutang an ira mga bitik. Nasiring hira, “Kinahanglan waray makakita ha ira.”

⁶Naglalarang hira hin magraot ngan nasiring, “Naglarang kami hin hingpit nga karat-an.” Urosahon gud an kasingkasing ug hunahuna han tawo!

⁷Kundi pinapana hira han Dyos, ngan nasasamad hira dayon.

⁸Paglalaglagon hira niya tungod han ira mga pulong;[112] magpipilingpiling an ngatanan nga makakakita ha ira.

⁹Mahahadlok hira ngatanan; magsusumat hira han ginbuhat han Dyos ngan maghuhunahuna hiunong han iya mga binuhatan.

¹⁰Magkakalipay an ngatanan nga magtadong tungod han ginbuhat han GINOO; matatalwas hira dida ha iya; magdadayaw ha iya an ngatanan nga mag-upay nga mga tawo.