Read Waray Samarenyo Meaning Based Mga Salmo 65 Bible Online

Mga Salmo 65 - Waray Samarenyo Meaning Based bible

Mga Salmo 65

¹[113] O Dyos, ini matadong para ha amon, nga didto ha Sion ikaw pagdayawon; mga saad namon ha im' pagtumanon,

²kay am' mga pag-ampo im' binabaton. Makadto ha imo an tawo ngatanan,

³tungod hadton ira mga kasal-anan. Di' magdaog hira[114] tungod kay salaan, kundi imo hira ginpapasaylo man.

⁴Palaran an mga ginpipili nimo nga magpuyo didto han imo sanktuaryo; mabubusog kami han kaupayan mo, didto han im' balay, baraan nga Templo.

⁵O Dyos nga amo an magtaralwas namon; imo kami tinatalwas, binabaton; pinaagi hin pagpadaog ha amon, ngan pagbuhat mo hin mga urosahon. Ikaw an sinasarigan han katawhan, ha ngatanan nga dapit han kalibutan; didto hadton higrayo nga katunaan, ha pataboktabok hadton kadagatan.

⁶Iginpahimutang mo an kabukiran pinaagi hadton imo pagkakusgan; ha pagpakita han imo kagamhanan, nga binubugkos han imo pagkakusgan.

⁷Sinasaway mo'n ngurob han kadagatan, ngan an aringasa hadton kabaloran; imo pinapamingaw an katawhan, tikang han ira rugyaw ngan karibhongan.

⁸Nahiudong an bug-os nga kalibutan, han im' nabuhat dagko nga mga butang; nakaparugyaw an imo binuhatan, ha paluyoluyo hinin katunaan.

⁹Pagpaid han tuna im' pinapakita, pinaagi hin pagpauran ha ira; amo ini an nag-aabuno manta, ngan nagpapatambok hadton mga tuna. Ginpupuno mo'n tubig an mga sapa, nga ha tuna imo ginpahimutang na; amo ini hira an nagpapabunga, hin damo nga abot hadton mga tuna. Amo ini'n paagi han pagbuhat mo:

¹⁰imo tinatagan hin uran nga damo; adton mga kaumhan nga inarado, ngan ha tubig ginpapahuroman nimo. Ngan an tuna imo man ginpapalumo, hadton tarahiti, nga tinuroturo; hadton mga gahi amo'n napatubo,

¹¹ngan hin hura nga babrion an hatag mo! Tanan nga dapit nga im' kinakadtoan, nagkakamay-ada mga kahuraan;

¹²Puno' mga panon adton panabsaban, puno hin pagrayhak adton kapungtoran.

¹³Kakarnerohan nagpuno han kaumhan, puno man hin trigo mga kahamub-an; nagoliat ngan narayhak an ngatanan, ngan nagkakaranta nga may kalipayan.