Read Waray Samarenyo Meaning Based Mga Salmo 66 Bible Online

Mga Salmo 66 - Waray Samarenyo Meaning Based bible

Mga Salmo 66

¹[115] Ngadto ha Dyos goliat hin malipayon, tanan nga katawhan, hiya pagdayawon!

²Pasidungog han iya ngaran kantahon, halari hin pagdayaw nga malipayon!

³Siring ngadto ha Dyos, “Pagkaurosahon! hadton mga butang nga im' buruhaton! imo gahom hin pagkadako hin duro, mga kaaway mo ha im' nanyuyukbo.

⁴Nagsisingba ha imo an katawhan, an tagsa nga tawo hinin kalibutan; pagdayaw ha im' ira ginkakantahan, hin kanta hin pagdayaw an imo ngaran.”

⁵Kadi kitaa kanan Dyos binuhatan, dagkong mga buhat dida han katawhan.

⁶Ginhimo niya an dagat nga kamad-an, ginlaktan pagtabok han at' kaapoyan. Didto hito kami gudman nanagrakya, tungod hadton mga ginbuhat gud niya;

⁷Naghahadi hiya gud in kadayonan pinaagi'n iya kusog nga gamhanan. Ngan ginbabantayan niya'n kanasoran, mga masupilon diri tutugotan.

⁸Pagdayaw han Dyos, kamo nasod ngatanan, himoa'n iyo pagdayaw nga hidunggan.

⁹Iya gintugot nga kita mabuhi pa, ngan waray tumugot nga mapukan kita.

¹⁰O Dyos, kami imo nga ginsarihan na, daw salapi ha kalayo pag-uraya.

¹¹Nga mabitik kami imo tinugotan, hin magbug-at nga darad-on ginpapas-an;

¹²nga han am' kaaway pagtamak-tamakan, kalayo ngan baha amon ginlatasan. Kundi ito yana kami im' gindara, ngat' hin dapit nga waray kataragman na.[116]

¹³Ha im' balay mga halad pagtubora; sugad nga halad han akon iginsumpa.

¹⁴Ighatag ko ha im' an ak' ginsumpaan, han nakadto ak' han mga kakurian.

¹⁵Maghahalad ako hin kakarnerohan, nga pagtutuboron dida han halaran. Maghahalad ak' ha im' hin kabakahan, ngan hin halad pa nga mga kakandingan; tikang hini maalimwag kaasohan, masaka ha langit ngat' ha kahitas-an.

¹⁶Kamo ngatanan nga ha Dyos matahoron, kadi ha akon ngan iyo pamation; kay akon igsasaysay an susumaton, han ngatanan nga ginbuhat n'ya ha akon.

¹⁷Nagsangpit ak' hin pakibulig ha iya, ngan ak' hiya gindayaw hin mga kanta.

¹⁸Kon ginpabay-an ko an ak' mga sala, diri gud ak' pinamamatian niya.

¹⁹Kundi ha tinuod han Dyos ak' hindunggan, an ak' pag-ampo iya pinamatian.

²⁰Tungod hini an Dyos ak' gindadayaw man, tungod kay an iya gugma di' naundang.