Read Waray Samarenyo Meaning Based Mga Salmo 68 Bible Online

Mga Salmo 68 - Waray Samarenyo Meaning Based bible

Mga Salmo 68

¹[118] Bumuhat na an Dyos, hinaot pa unta, ngan pasadngon adton mga kaaway n'ya; hinaot nga an nagdudumot ha iya, kumalagiw tikang ha atubangan n'ya.

²Daw sugad hin iginpapalid nga aso, tatabogon hira niya hin tutoo. Daw sibo nga natutunaw ha kalayo, ha Dyos magkamatay magraot nga tawo!

³Kundi magmamalipayon an magtadong, ha prisensya han Dyos hira malipayon. An ira kalipay nga pagbabation, rayhak nga matuod, waray na matupong.

⁴Pagkanta ha Dyos dayawa'n iya ngaran, an nasakay ha dampog[119] angay kantahan; An GINOO amo adton iya ngaran, pagmalipayon ha iya atubangan!

⁵Ikaw an Dyos nga amo an nagpupuyo, adton hadton imo baraan nga templo, amay nga napaid hadton mga ilo, ngan nananalipod hadton mga balo.

⁶An minimingaw tinatagan puroy-an, ngan an mga priso ira katalwasan. Kundi adton mga masupilon gudman, adto pagpupuyo dit' ha kamingawan.

⁷Ha im' pagmando, O Dyos, han im' katawhan, han imo paglatas hadton kamingawan.

⁸Han pag-abot han Dyos linminog, inmuran, an Dyos han Israel ngan Dyos han Sinai[120] man.

⁹Imo ginpabunok in banos nga uran, ngan ginpatambok mo uga nga kaumhan.

¹⁰Didto na pagpuyo an imo katawhan, ha kamaupay mo kablas nabuligan.

¹¹An Ginoo nga Dyos naghatag han sugo, ngan ginsumat ini'n babaye nga damo:

¹²“Nakalagiw na an mga hadi,” kuno “upod liwat an ira mga sondalo!” An didto ha balay nga kababayen-an amo an nagbahinbahin han dinag-an.

¹³Sugad hira'n tukmo nga sinalapian, nainggat an pako putos hin bulawan. (Ano'n iba niyo bilin ha toril man?)

¹⁴Ha Bukid Salmon hin yelo ginpauran han pagpasaranga hadton kahadian han aton Dyos nga Gamhanan han Ngatanan.

¹⁵Hin pagkagamhanan han Bukid ha Basan, bukid nga damo gud adton kasampawan!

¹⁶Kay ano nga imo la ginyuyubitan, an bukid[121] nga han Dyos ginpili pag-okyan? Imo gintatan-aw, imo gintamay man, tikang han higtaas mo nga kasampawan. Bukid nga ginpili asay pag-uokyan han at' GINOO hin waray kataposan.

¹⁷Upod an gamhanan nga kakar'wahian nga yinukotyukot kon iphon an tanan. Tikang ha Sinai naabot[122] Ginoo man ngadto hadton dapit niya nga baraan.

¹⁸Nasagka man hiya nga't ha kahitas-an, dara adton mga bihag nga kadam-an. Mga masupilon hiya tinatagan, an GINOO nga Dyos didto an urokyan.

¹⁹Dayawa an GINOO nga nagdadara, han adlaw-adlaw nga mga darad-on ta. Amo hiya an Dyos nga natalwas manta,

²⁰an Dyos nga natalwas nga Dyos naton yana. Hiya an GINOO, an Ginoo naton, nga nagtatalwas tikang han kamatayon.

²¹Ulo han kaaway iya bubuongon, adton naawil han sala pagpadayon.

²²Amo ini'n iginsiring han Ginoo, “Iyo mga kaaway igbabalik ko; an tikang ha Basan dadad-on ha iyo, tikang han dagat nga higlarom hin duro.

²³Pababalikon ko hira nga't ha iyo, bas' makagyapak kam' hadton ira dugo; ngan makaglaklak an kaayaman niyo tubtob gud han ira karuyag mahimo.”

²⁴O Dyos, an martsa han imo kadaogan, hinkit-an gud han ngatanan nga katawhan. An prusisyon han Dyos nga akon hadi man ngadto han iya dapit gud nga baraan.

²⁵Mga magkaranta an ha atubangan, an mga musikero ha talikoran; ha butnga nira dida'n kadaragan-an nga mga tamburin ira tinukaran.

²⁶“Dayawon ha kalipay an Dyos han tanan, dida han katirok han iya katawhan. Pagdayawon an GINOO han ngatanan nga kanan Israel mga katulinan!”

²⁷Una an Benjamin, gutiay nga tribo, ngan pundok han Juda ngan mga pangulo; sinusundan ini hadton mga puno hadton Zabulon ug Neftali nga tribo.

²⁸O Dyos ipakita an kagamhanan mo, gahom nga tungod ha amon im' ginhimo.

²⁹Ha Jerusalem tikang gud han im' Templo, diin kahadian ha im' nagregalo.

³⁰Sawaya'n Ehipto, adton mananap man, ngan aada dida han kabunglayonan; sayawa'n mga nasod daw kabakahan, upod gud an ira mga kanatihan. Sawaya tubtob nga yumukbo gud hira, ngan maghalad ha im' han salapi nira; in sugad nga katawhan, Dyos, pagsaranga, hira nga hin araway naruruyag la![123]

³¹Mga imbahador[124] magkakaabot na, tikang ha Ehipto hirayo nga tuna; an taga-Etiopia han kamot maalsa, mag-aampo ha Dyos an katawhan nira.

³²Mga ginhadian ha tuna, pagkanta, pagkanta, an Ginoo an pagdayawa,

³³ha langit nga kadaan nasakay hiya! Tingog niya nga gamhanan pamatia!

³⁴Isangyaw an kanan Dyos pagkagamhanan, iya pagkaharangdon ha Israel man; an iya kagamhanan ha kalangitan, ipahinungod gud ha Dyos it' ngatanan.

³⁵Hin pagkaurosahon hinin Dyos gudman, nga aada han dapit n'ya nga baraan! Kusog, gahom, katawhan n'ya tinatagan. An Dyos han Israel dayawon han 'tanan!