Read Waray Samarenyo Meaning Based Mga Salmo 69 Bible Online

Mga Salmo 69 - Waray Samarenyo Meaning Based bible

Mga Salmo 69

¹[125] Luwasa ako, O Dyos! Napaliog na ha akon an tubig.

²Nauunlod ako dida hin hilarom nga lapok, ngan waray gud marig-on nga tuna; aada ako ha hilarom nga tubig ngan ginlulumsan ako han mga balod.

³Kinakapoy na ako pagtinawag hin bulig, ngan masakit na an akon but-ol; masirom na an akon mga mata hin pagpinangita han imo tambulig.

⁴Darudamo pa han mga buhok han akon ulo an mga nagdudumot ha akon hin waray hinungdan; magkusog ngan karuyag pumatay ha akon adton mga nagbubuwa kon kay ano nga akon hira mga kaaway. Iginpauli nira ha akon in mga butang nga waray ko pagkawata.

⁵Diri natatago ha imo, O Dyos, an akon mga sala; maaram ka han akon kalurong-lurong hadto!

⁶Ayaw itugot nga magpakaalo ako hadton mga nasarig ha imo, O Ginoo nga DIYOS nga Labi Kamakagarahum! Ayaw itugot nga magpahiubos ako hadton mga nagsisingba ha imo, O Dyos han Israel!

⁷Tungod ito ha imo nga ginyubitan ako, ngan nga napuputos ako hin kaalo.

⁸Sugad ako hin dumuruong ha akon kabugtoan, sugad hin lumalangyaw ha akon panimalay.

⁹Naglalaga ha akon sugad hin kalayo an akon kasindak para han imo Templo; nahuhulog ha akon an mga pagyubit nga iginlabay ha imo.

¹⁰Nagpapaubos ako ha akon ngahaw[126] pinaagi hin pagpuasa, ngan gintatamay ako han mga tawo.

¹¹Nagbibisti ako hin mga panapton han kabidoan, ngan gin-iintrimisan ako nira.

¹²Naghihiruhimangraw hira ha mga kalsada hiunong ha akon, ngan nagkukumposo hin mga kanta hiunong ha akon an mga parahubog.

¹³Kundi para ha akon, mag-aampo ako ha imo, O GINOO; batona ako, O Dyos, ha panahon nga imo pinili, tungod han imo dako nga gugma, kay imo tinutuman an imo saad pagtalwas.

¹⁴Talwasa ako tikang han pagkaunlod ha lapok; talwasa ako tikang han akon mga kaaway, ngan tikang han hilarom nga tubig.

¹⁵Ayaw itugot nga lapwason ako han baha; ayaw ako itugot nga malumos ha mga kahiladman, o itunod ha lubnganan.

¹⁶Batona ako, O GINOO, ha kamaupay han imo dayuday nga paghigugma; lingia ako, ha imo dako nga pagkalooy!

¹⁷Ayaw tagoi an imo surugoon; batona ako yana—nagkukuri gud ako!

¹⁸Pakadi ha akon ngan talwasa ako; bawia ako tikang han akon mga kaaway.

¹⁹Maaram ka kon gin-unan-o pagyubit ha akon, kon gin-unan-o pagpakaalo ngan pagpahiubos ha akon; hinkikit-an mo an ngatanan nga akon mga kaaway.

²⁰Nasamad an akon kasingkasing han mga pagyubit, ngan makalolooy gud ako. Nagpaabot ako hin pagpaid, kundi waray gud; hin pagliaw, kundi waray gud inmabot.

²¹Gintagan ako nira hin hilo, han ginugutom ako; gintagan ako nira hin suoy, han inuuhaw ako.

²²Magin ira unta kabungkagan an ira mga kumbiti; magin ira unta pagkapukan an ira mga pagsalin-urog!

²³Butaha hira basi diri na makakita; paluyaha dayuday an ira mga taludtod!

²⁴Huwara ha ira an imo kasina; pahiabti hira han imo kapungot!

²⁵Mabinayaan unta an ira mga kampo; waray unta mahibilin nga buhi ha ira mga tolda!

²⁶Gintitimaraot nira adton imo mga ginhampak; naghihiruhimangraw hira hiunong han mga pag-antos hadton imo mga ginsamad.

²⁷Ilista an ngatanan nira nga mga sala; ayaw hira bahini han imo katalwasan.

²⁸Mapara unta an ira mga ngaran tikang han basahon han mga buhi; diri unta hira mahiupod han lista han imo katawhan.

²⁹Kundi makalolooy gud ako ngan inuul-olan; alsaha ako, O Dyos, ngan talwasa ako!

³⁰Dadayawon ko hin kanta an Dyos; igsasangyaw ko an iya pagkadako pinaagi hin pagpasalamat ha iya.

³¹Makakalipay ini han GINOO labaw pa hin paghalad ha iya hin baka, labaw pa gud hin paghatag ha iya hin todo nga baka.

³²Malilipay an mga magpakalolooy kon makakita hira hini; madadasig adton mga nagsisingba han Dyos.

³³Namamati an GINOO hadton mga nagkikinahanglan, ngan diri nalilimot han iya katawhan ha bilanggoan.

³⁴Pagdayawa an Dyos, langit ug tuna, an kadagatan ngan ngatanan nga mga binuhat dida ha ira!

³⁵Tatalwason niya an Sion, ngan titindogon liwat an mga bungto han Juda; mag-uokoy didto an iya mga tawo ngan ira aangkonon an tuna;

³⁶panunundon ito han mga tulin han iya mga surugoon, ngan mag-uokoy didto adton mga nahigugma ha iya.