Read Waray Samarenyo Meaning Based Mga Salmo 7 Bible Online

Mga Salmo 7 - Waray Samarenyo Meaning Based bible

Mga Salmo 7

¹[9] GINOO, akon Dyos, ako nadangop hin panalipod; Talwasa ako ngan bawia han mga nagbubukod,

²bangin sugad hin liyon ako nira dad-on ha dapit nga waray makakatalwas ha akon, ngan didto ira ako paghunothunoton.

³GINOO, akon Dyos, kon nakasala ako hin tawo, ginraogdaog ko in kaaway,[10] hin sangkay ako naglingo— bisan ano hini nga akon ginbuhat—

⁵tugoti an kaaway ha akon paglanat, tugoti pagtigbas, ha akon pagpatay, bayaan ha tuna kinabuhi waray.

⁶Bangon, O GINOO, tungod han imo kasina! Tindog ngan an pamintas han kaaway asdanga; pagmata, panginano ug buligi ako! An katadongan ha imo an nagsusugo.

⁷Tiroka ngada ha imo an ngatanan nga katawhan, ngan paghadi ikaw ha ira tikang ha kahitas-an.[11]

⁸Ikaw an maghurukom han ngatanan nga mga tawo. Upaya ha akon an paghukom kay waray sala ako.

⁹Ikaw an Dyos nga matadong, naghuhukom han hunahuna ug karuyagan namon. Han magraogdaog nga tawo paukya an karat-an, ngan tagi hin pahalipay an tawo nga buotan.

¹⁰An Dyos amo an nasalipod ha akon; natalwas hiya hadton mga masinugtanon.

¹¹An Dyos matadong nga maghurukom han ngatanan, an magraogdaog kanunay iya pagsisirotan.

¹²Kon diri hira magbalhin han ira mga ginawian, an bangkaw babairon han Dyos, an pana ha ira andam;

¹³kinukuha niya an nakakamatay nga mga hinganiban, ngan an mga pana binabawog niya nga daan.

¹⁴Kitaa, kamaraot an hunahuna hini nga mga tawo; limbon an ira ginbuhat ngan samok an panuyo.

¹⁵Dida an bitik nga para han iba ira gin-andam, waray iba, lugod, hira la ngahaw an hinsakban.

¹⁶An ira kamaraot amo ngahaw an nagsirot ha ira, ngan sinakitan hira tungod han ira pakigburoka.

¹⁷Han GINOO tungod han iya katadongan, nagpasalamat ako; magaawit ako hin pagdayaw, han Gihahataasi nga GINOO.