Read Waray Samarenyo Meaning Based Mga Salmo 72 Bible Online

Mga Salmo 72 - Waray Samarenyo Meaning Based bible

Mga Salmo 72

¹[130] Hin paghukom, O Dyos, an hadi tutdoan, paangbita hiya han im' katadongan;

²Basi an imo katawhan paghadian hin matadong pati an mga kablas man.

³Magmainuswagon na unta an tuna, ngan an pagkamatadong pagbuhaton na.

⁴An kablas paghukman hin matadong unta, ngan magraogdaog iya dugmokon na.

⁵Pagsingbahon ka unta han im' katawhan, samtang nga an adlaw ha igbaw nasirang; samtang nahatag pa'n kapawa an bulan ha ngatanan gud nga mga katuigan.

⁶Mapariho unta an hadi hin uran, o hin tarahiti ha mga kaumhan;

⁷ha iya panahon mamay katadongan, ngan pag-uswag samtang nasirang an bulan.

⁸Umabot unta an iya ginhadian ha pataboktabok hadton kadagatan; tikang han salog nga Eufrates an ngaran, ngadto pa gud ha sidsid han kalibutan.

⁹Adton mga katawhan ha kamingawan, manyuyukbo na ha iya atubangan; ngan an mga kaaway niya ngatanan manlulunay na ha katapotapohan.

¹⁰Kahadian ha kapupud-an, Espania, hin mga regalo ha iya magdara; mga hadi ha Arabia ug Etiopia, magdadara'n mga halad nga't ha iya.

¹¹Adton mga kahadian gud ngatanan, manyuyukbo na ha iya atubangan; tanan nga mga nasod ha kalibutan, mag-aalagad ha iya an ngatanan.

¹²Mga kablas nga nagtatawag ha iya, iya manta nga binubuligan hira; sugad man an mga tawo nga kabos na, ngan adton mga ginpasibay-an nala.

¹³Nalolooy hiya han kablas, magluya, tinatalwas man adton mga runos na.

¹⁴Tinatalwas tikang pagraogdaoga, ira kinabuhi mahal gud ha iya.

¹⁵Mabuhi an hadi ha takna ngatanan! Bulawan ha Arabia h'ya paghatagan; ig-aampo hiya ha takna ngatanan, maiya pirme kanan Dyos kaupayan.

¹⁶Hinaot pa unta nga magmadamo na, an makaraon nga matubo ha tuna; adton kabukiran maluob hin bunga, masugad han Libano iya kahura. Mapuno an mga syudad hin katawhan, sugad han pagtabo hadton kabanwaan.

¹⁷Iya ngaran diri unta hingalimtan, daw adlaw magdayon iya kabantogan. Dayawon unta h'ya han nasod ngatanan, pangaroon ha Dyos han 'tanan katawhan; nga tagan hira han Dyos hin kaupayan, sugad han ginbuhat ngadto han hadi man.[131]

¹⁸An Dyos ha Israel, GINOO, dayawon, h'ya la'n nagbubuhat mga urosahon;

¹⁹Harangdon nga ngaran n'ya daygon hin dayon, kahuraan niya an tuna pagpun-on. Amen! Amen!

²⁰An kataposan han mga pag-ampo ni David nga anak ni Isai.