Read Waray Samarenyo Meaning Based Mga Salmo 73 Bible Online

Mga Salmo 73 - Waray Samarenyo Meaning Based bible

Mga Salmo 73

¹[132] Maupay gud an Dyos han mga Israelita, hadton may kinasingkasing nga paghigugma.

²Kundi, harapit na an akon pagtapod mawara, ngan an akon pagtoo kon haros na mapara.

³Tungod kay han mapahitas-on ako naawa, kon nakita ako nga maupay an kinabuhi nira.

⁴Hin mga pag-antos hira nahigawas, magkusog ug mag-upay an ira mga lawas.

⁵Sugad han iba, waray nira kakurian, ngan waray nira mga kasamokan.

⁶Sanglit an parayaw kuwentas nira ha liog, ira la panapton an kamaraogdaog.

⁷Ha ira kasingkasing nagawas an karat-an,[133] an ira hunahuna puno hin katuyawan.

⁸Matamay han iba, maraot an yayaknon, ngan magraogdaog, mga parayawnon.

⁹Ira ginyuyubit an Dyos ha kalangitan, hambog hira magsugo dinhe ha kalibutan.

¹⁰Sanglit bisan an magtinuohon ha ira nasunod, han ira mga yayaknon, hira natuod.[134]

¹¹Siring nira, “An Dyos diri mahibabaro, an Gilalabawi diri manginginano.”

¹²Amo ini an kinabuhi han magraot nga tawo, hura na hira, karuyag pa magriko.

¹³Kawang la ngay-an an akon pagkaputli ngan han kawaray sala han akon kinabuhi?

¹⁴Bug-os nga adlaw ako nag-aantos, Dyos ko, ha kada aga imo ako ginkakastigo.

¹⁵Kon ginyakan ko in sugad nga butang, sugad nga diri ako kausa han imo katawhan.

¹⁶Sanglit gintinguha ko nga ini akon hisabtan, bisan kon may-ada damo nga mga kakurian.

¹⁷Didto ko hisayri ha imo Templo, kon ano han magraot an mahinanabo.

¹⁸Ibubutang mo hira ha madalunot nga dalan, basi mahitalindas ngadto ha pagkapukan.

¹⁹Ha gilayon hira mapupukan, makangingirhat an ira kataposan.

²⁰Sugad hin inop nga napapas ha aga, ha imo pagmata, dayon nawawara.

²¹Han mapait an akon panumdoman, ngan ginsakit inin akon balatian.

²²Owat gud man ako sugad hin kamanampan, ha imo waray ako sarabotan.

²³Kundi dayuday diri ako napahirayo ha imo, ngan ha imo kamot tinutugwayan nimo ako.

²⁴Imo mga sagdon ha akon nagmamando, ha kataposan ako an pasisidunggan nimo.

²⁵Ikaw an akon paglaom didto ha himaya, ano pa an akon bibilngon dinhe ha tuna?

²⁶Hunahuna ug lawas ko bangin magmaluya, kundi an Dyos, nga kusog ko, an akon ungara.

²⁷Tinuod nga magkakamatay manta, adton ha imo nagpapasibaya.

²⁸Kundi para ha akon hin kamakaaramdok, kon ako ha Ginoo mahiduok! Han Ginoo nga DYOS ako masalirong, ngan magsasangyaw han iya buruhaton!