Read Waray Samarenyo Meaning Based Mga Salmo 74 Bible Online

Mga Salmo 74 - Waray Samarenyo Meaning Based bible

Mga Salmo 74

¹[135] Kay ano, O Dyos, nga ginpapabay-an mo kami? han imo mga tawo masisina ka ba hin pirme?

²Panumdom gad han ginpili mo nga katawhan, nga imo gin-angkon na hadto pa nga katuigan; nga imo ginlukat han pagkaoripon, ngan ginhimo nga imo tribo nga kalugaringon. Dumdoma an Bukid Sion nga imo gin-ukyan.

³Kadi, pagsudoy ha bug-os nga kabungkagan; an amon mga kaaway amo an nagpukan, ha sulod han Templo ginpuo an ngatanan.

⁴An mga kaaway sinmulod han Templo, nagoliat nga madinaogon kontra ha imo; ug didto an ira bandera ira ginbutang, tigaman han ira pagdarag-an.

⁵Sugad hin paragkahoy nga mga tawo, nga namumulod hadton kahoy nga damo.[136]

⁶Tabla nga mga bungbong ira ginmaso, han ira mga parakol ug martilyo.

⁷Ginsuritan nira adton imo Templo, ginhugawan an siringbahan ha imo. Ira ginwakay, ginbungkag an ngatanan.

⁸An pagpirde ha amon ira na ginlarang. Ira ginsuritan ngan ira gin-ugtang, ha tuna an mga dapit nga baraan.

⁹Waray na an baraan nga pangilal'an, bisan an mga manaragna ngatanan; ngan waray gud bisan usa nga maaram, kon tubtob san-o ini nga kahimtang.

¹⁰Tubtob san-o, Dyos, kami pagtitinawaan, han amon mga kaaway pagdidinurugasan? Padayon ba ini, waray kataposan, nga pagyinubit nira han imo ngaran?

¹¹Kay ano nga imo kami ginpabay-an, ngan dinmiri ka man ha amon pagtabang? Kay ano nga diri kami nimo buligan, mga kamot nimo imo ginhahawiran?[137]

¹²Kundi hadi an Dyos ha tinikangan pa, nga nagmadinaogon dinhe ha tuna.

¹³Tungod han gahom mo, imo ginbuhag an dagat, ulo han mananap ha dagat imo ginpusak.

¹⁴Ginpusak mo an ulo ni Lebiatan,[138] ug gintubong mo ha ihalas nga kamanampam.[139]

¹⁵Imo ginpaawas mga burabod ug tuboran, imo ginpamara an dagko nga kasapaan.

¹⁶An adlaw ug gab-i gintuha nimo, an adlaw ug bulan ginpahimutang mo.

¹⁷Tinagan mo an tuna hin pag-ultan, an kathagkot ug katsirak imo iginbutang.

¹⁸Kundi hinumdomi ini, GINOO, imo kaaway nag-iinintrimis ha imo. Diri ha imo hira nakilala, ngan nagyuyubit, nagtatamay pa hira.

¹⁹Ayaw hira, O Dyos, isalikway, ngadto ha mga magbangis nga kaaway. An imo makalolooy nga katawhan, an ginpakaraot, diri mo hingalimtan.

²⁰Hinumdomi adto nga ginkasarabotan, ginhimo mo ha amon, imo mga katawhan. Kay ha mga dapit nga may kasisidman, an mga pagraogdaog hiaagian.

²¹Diri unta adton mga ginraogdaog, ha kaarawdan hira mahulog; kundi hira nga aada ha kakablasan, papagdayawa na han imo ngaran!

²²Bangon na gad, O Dyos, ngan imo ugopan, panalipdi an imo mga katuyoanan; adton diri diyosnon imo hinumdoman, nga nag-iinintrimis ha imo adlaw ngatanan.

²³Ayaw hingalimti mga kaaway nimo, nga ha ira kapungot nagoliat hin dagko; adton aringasa ira ginhihimo, waray hunong nga samok han mga kontra nimo.