Read Waray Samarenyo Meaning Based Mga Salmo 75 Bible Online

Mga Salmo 75 - Waray Samarenyo Meaning Based bible

Mga Salmo 75

¹[140] O Dyos, ikaw am' ginpapasalamatan! An im' pagkadako amon ginsasangyaw; ngan am' iginsusumat an[141] mga butang nga urosahon nga imo binuhatan!

²Nagsisiring an Dyos, “Ako nagtalaan hin panahon nga para na han hukmanan; diin akon paghuhukman an ngatanan, hin paghukom nga waray gud inugopan.

³Bisan pa mangurog inin kalibutan, ngan an mga umurukoy hit' ngatanan; bisan pa mabay-og adton katunaan, ak' paririg-onon an patukoranan.

⁴Ginsisiring ko adton mga yawan-on nga diri na hira magpinahitas-on;

⁵akon ginsisiring hira nga humunong adton ira duro nga paghinambogon.”

⁶Di' tikang ha sinirangan o katundan, o tikang ha amihanan o timogan.[142]

⁷An paghukom, kundi Dyos an naglalarang, may ginsisirotan, may ginbubuhian.

⁸Kay may-ada kinakaptan an GINOO, nga daw usa nga tagayan nga ginpuno; puno hin bag-o ngan mapintas nga bino, nga bino han iya kasina nga duro. Ngan iya man ini nga pag-iipison, ngan mainom hini an mga yawan-on; ngan ira gud ini nga pagtutungkason, ngan kataposan nga turo uuboson.

⁹Kundi di' gud ako gihapon mahunong, an kan Jacob Dyos ak' paghihimangrawon; ngan akon man liwat pagkikinantahon, mga pagdayaw ha iya hin padayon.

¹⁰Iya pag-uutdon ngan pagbubungkagon, adton mga sungay, gahom han yawan-on; kundi iya manta nga patutuboon an pagkagamhanan han mga magtadong.