Read Waray Samarenyo Meaning Based Mga Salmo 76 Bible Online

Mga Salmo 76 - Waray Samarenyo Meaning Based bible

Mga Salmo 76

¹[143] Kilala gudman an Dyos didto ha Juda, didto ha Israel bantogan gud hiya.

²Ngan an Jerusalem puroy-anan niya, ha bukid han Sion nag-uokoy hiya.

³Didto iya pinanmungkag, pinanruba, an kanan mga kaaway mga pana; ira mga taming, ngan mga espada, ngan ngatanan mga hinganiban nira.

⁴O Dyos hin pagkamakagarahum nimo; matuod gudman hin pagkaharangdon mo; han nabalik ka tikang han kabukiran, diin mga kaaway mo ginpirde man!

⁵Ira gud pinannguhaan han ngatanan, an mag-isog nira nga kasondalohan; nanlunay na ha dayon nga pahuwayan, w'ray na gamit ira kusog, kabatiran.

⁶Han imo pagtarhog, pagsaway ha ira, O Ginoo nga Dyos, nga Dyos ni Jacob ka; kakabayohan ngan sumarakay nira pareho nahulog ngan nagkakatumba.

⁷Ikaw, GINOO, hin kamakalilisang! amo ikaw an angay gud kahadlokan; waray gud ha imo nga nakakaasdang, ha takna nga mayda nim' nasisinahan.

⁸Tikang ha langit paghukom im' ginyakan, ngan nagmingaw, nahadlok an kalibutan.

⁹Han imo pagtindog ngan imo paglarang, pagtalwas han ginraogdaog ngatanan.

¹⁰Nabunga la'n kasina han mga tawo, hin damo pa nga pagdayaw gud ha imo; adton nanhisalin han away nga tawo an magsasaurog han mga pyesta mo.[144]

¹¹Ha GINOO nga imo Dyos ihatag na an imo ginsumpa, ginsaad ha iya hin mga regalo ha iya padad-a tanan mga nasod nga kahigrani ta. Ginhihimo han Dyos nga an mga tawo ha iya mahadlok tumahod, yumukbo.

¹²Gin-usmod mga prinsipi nga garboso, ginlilisang an kahadian nga dagko.