Read Waray Samarenyo Meaning Based Mga Salmo 78 Bible Online

Mga Salmo 78 - Waray Samarenyo Meaning Based bible

Mga Salmo 78

¹[148] Akon mga tawo, pamati han akon pagturon-an, ngan tigamni an akon mga ginyayakan;

²Kay akon igtutug-an yana ha iyo, an kadaanan nga mga misteryo.

³Mga butang nga aton hinbabaroan, tikang han aton mga ginikanan;

⁴diri ini iglilirong ha aton kabataan, Sunod nga katulinan amon pagsusumatan.

⁵Mga tawo han Israel hin balaod gintagan, ngan hin mga sugo an kan Jacob katulinan; ginsugo an aton mga ginikanan, pagtutdo han balaod ha ira kabataan.

⁶Basi mahibaro an sunod nga katulinan, matutdoan liwat an ira kabataan.

⁷Ha Dyos an ira pagtapod igbubutang, an iya mga buhat diri hingangalimtan, kundi dayuday han iya mga sugo magtutuman.

⁸Diri hira magsusubad han ira mga ginikanan, nga masupilon, maglaris nga katawhan; kanay pagsarig han Dyos waray karig-onan, ngan waray ha iya magpadayon hin pagtuman.

⁹Tulin ni Efraim nga sangkap hin pana, nanadlagan han pag-araway nira.

¹⁰Ginsaaran han Dyos waray nira pagtipiga, waray nira sugta an mga balaod niya.

¹¹An iya ginbuhat ira hinngalimtan, sugad han mga milagro nga ira hinkit-an.

¹²Samtang nagkikita an ira ginikanan, han mga milagro didto ha Soan.

¹³Ginbuhag an dagat ug hira tinmalabok, an tubig daw pader iya ginpatindog.

¹⁴Ha adlaw, hin dampog ginmandoan hira, ngan ha gab-i, may kalayo nga suga.

¹⁵Bato ha kamingawan iya ginbuka, inmawas in tubig nga ginpainom ha ira.

¹⁶Tinmubod in burabod tikang han bato, usa nga salog hin tubig an nahimo.

¹⁷Kundi nagpadayon hira hin pakasala, didto ha kamingawan han Dyos inmato hira.

¹⁸An pagsari han Dyos ira gintuyo, an ira karuyag nga pagkaon hira nangaro.

¹⁹Siring nira, “Makakahimo an Dyos nga GINOO, ha kamingawan pag-andam hin sasaro?

²⁰Tinuod nga bato an ginbalbag niya, binmugwak in tubig ngan tigda ginmuwa; ha iya katawhan nakahatag ba hiya, hin tinuod nga tinapay ug karne nga sora?”

²¹Sanglit nasina gud hito an GINOO, iya ginsulong hira hin kalayo; kasina dinmugang

²²kay waray nira pagtoo, ngan pagsarig nga makakatalwas an GINOO.

²³Kundi ngadto ha langit nagsangpit hiya, ngan nagsugo pagbukas han mga porta.

²⁴Pagkaon ha langit ginhatag ha ira, han pagpaurani ha ira hin mana.

²⁵Tinapay hin anghel an ira pinangaon, iginhatag ha ira hin patakas an kada malon.

²⁶Hangin ha sinirangan ginpahuyop niya, tungod han iya gahom, timog an ginpaguwa.

²⁷Damo nga mga tamsi an iya ginpahugdon, sugad hin kadamo han baras ha baybayon.

²⁸Ginpahugdon ini ha butnga han ginkampohan, palibot han mga tulda han kapatagan.

²⁹Sanglit nangaon, nabusog an katawhan, iginhatag han Dyos an ira kinahanglan.

³⁰Kundi samtang nagpipinangaon hira,

³¹an Dyos ha ira inalpan hin kasina. An maisog nga tawo iya ginpukan, sugad man han kan Israel batan-on nga kalalaken-an.

³²Bisan may milagro, an mga tawo nagpinakasala, ngan nawarayan hin pagtapod ha iya.

³³Sanglit usa nga hangos gintapos an kinabuhi nira, pinaagi hin tigda ug kalit nga disgrasya.

³⁴Kundi kon ginpapatay niya an iba, may nagbabasol, nabalik ha iya; nagbabasol hira ngan nag-aampo pa, hin tinuodtuod ngadto ha iya.

³⁵Nanumdom hira nga an Dyos ira darangpan, ngan an Labi Kamakagarahum ha ira natabang.

³⁶Kundi an ira mga pulong puros buwa, an ginyakan nira mga ulog-ulog la.

³⁷Nagpadayon hira hin kamalingoon, ug han ginsaaran diri matinumanon.

³⁸Kundi maloloy-on an Dyos han iya katawhan, iya ginpapasaylo an ira mga kasal-anan; waray man niya puoha an ngatanan, agsob nga an iya kasina iya ginpupudngan.

³⁹Nahinumdom hiya nga an mga tawo magluya, daw sugad hin hangin lumalabay la.

⁴⁰Didto ha kamingawan, agsob hira inmato, ginbido hiya nira hin makadamo.

⁴¹Agsob nira an Dyos pagsarihan, an baraan ha Israel pagpakurian.

⁴²Ira hinngalimtan an iya kagamhanan, nga amo an nagtalwas ha ira ngatanan.

⁴³Han iya pagbuhat hin mga milagro, ha patag han Soan, didto ha Ehipto.

⁴⁴Mga salog ginhimo niya nga dugo, basi diri makainom an taga-Ehipto.

⁴⁵Ginpadara in kalangawan hin pagsakit ha ira, ngan an napaklahan hin pagdaot han ira uma.

⁴⁶Mga kabalay hin duron iya ginpadara, nagkaon han tanom ug nagbungkag han uma.

⁴⁷Tungod han yelo nga mga uran, namatay an mga ubas ug kaigosan.

⁴⁸Tungod han hagkot nagpatay an kabakahan, ngan an ira mga panon ginlintian.[149]

⁴⁹Tungod han iya kapungot iya hira ginpakurian, mga anghel nga magburungkag iya hira ginparad-an.

⁵⁰Gintuman gud niya an iya kasina, waray hira talwasa, hin peste pinamatay hira.

⁵¹Pinamatay mga suhag nga kalalaken-an, han taga-Ehipto panimalay ngatanan.

⁵²Ngan nag-una hiya han iya katawhan, daw sugad hira hin kakarnerohan; ngan iya gud hira gintugwayan, han paglatas nira han kamingawan.

⁵³Gin-unhan niya, waray nira kahadlokan, ira kaaway han dagat natak-opan.

⁵⁴Gindara ngadto ha tuna niya nga baraan, ngadto han gindaog niya nga kabukiran.

⁵⁵Gintabog niya an mga kanasoran, samtang nasulong an iya katawhan; ngatanan han tribo han Israel tinagan, hin sadang nira pahuwayan.

⁵⁶Kundi inmato hira han Dyos nga gamhanan, sinmupil gud hira, ira ginsarihan; han iya mga sugo waray hira magtuman.

⁵⁷Sugad han ira mga ginikanan, masupilon hira, diri kasasarigan; sugad hin pana nga may kabalikoan.

⁵⁸Gin-orit hiya han ira siringbahan, ngan napungot hiya han ira ladawan.

⁵⁹Han pakakita han Dyos, napuno hin kapungot, sanglit an Israel ginsalikway niya hin tinuod.

⁶⁰Ginbayaan an iya tulda didto ha Silo,[150] an iya gin-ukyan tampo han mga tawo.

⁶¹An mga kaaway iya hira tinugotan, pagbihag han Kahon han Ginsaaran; tigaman han iya himaya ug kagamhanan.

⁶²Iya gud napungtan, iya nasinahan, an kalugaringon niya nga katawhan; ngan mga kaaway nira iya tinugotan, nga pamatayon hira ngatanan.

⁶³Kaolitawhan nagkamatay ha pag-awayan, nga waray nangasawa han ira kadaragan-an.

⁶⁴Kapadian ginlugos hin pamataya, waray makagtangis an mga balo nira.

⁶⁵Ha kataposan an Ginoo nagmata, daw sugad hin ginmumuokan la; sugad hiya hin maisog nga tawo, nga linmaksi tungod han bino.

⁶⁶An mga kaaway iya ginsibo, ngadto hin kapukan nga makaaalo.

⁶⁷Kan Jose katulinan ginsalikway niya, tribo ni Efraim waray niya pilia.

⁶⁸Lugod 'say ginpili an tribo ni Juda, ngan an Bukid Sion nga iya hinigugma.

⁶⁹Didto pagtindoga an templo niya, sugad hin urokyan niya didto ha himaya. Ginparig-on niya sugad han tuna, nga diri mababantad ha ngatanan nga takna.

⁷⁰Ginpili hi David, surugoon niya, tikang ha panabsaban hiya ginkuha.

⁷¹Diin nagmangno han mga karnero nga nati, ngan ginhimo hiya han Israel nga hadi. Ngan amo an magin magmarangno ngani, hadton mga tawo nga kanan Dyos pinili.

⁷²Nagmangno hi David hadto nga katawhan, hin hingpit nga pag-alagad ini gin-opdan; hin kinasingkasing iya ginmandoan, ngan iya hira hin maupay gintutdoan.