Read Waray Samarenyo Meaning Based Mga Salmo 79 Bible Online

Mga Salmo 79 - Waray Samarenyo Meaning Based bible

Mga Salmo 79

¹[151] O Dyos, ginsulong han mga Hentil an tuna han imo mga tawo! Ginhugawan nira an imo baraan nga Templo ngan ginbayaan an Jerusalem nga bungkag na.

²Ginbayaan nira nga kaonon han katamsihan an mga lawas han imo mga tawo, para han ihalas nga kamanampan an mga lawas han imo mga surugoon.

³Ginpaawas nira sugad hin tubig an dugo han imo mga tawo; inmawas an dugo sugad hin tubig ha bug-os nga Jerusalem, ngan waray nahisalin paglubong han mga minatay.

⁴Gin-iintrimisan kami han mga nasod palibot namon; gintitinawaan ngan gin-uuyan-uyan kami nira.

⁵Tubtob san-o an imo kasina ha amon, O GINOO? Kadayonan ba? Magpapadayon ba paglaga sugad hin kalayo an imo kasina?

⁶Kasinahi an mga nasod nga diri nagsisingba ha imo, an mga tawo nga nagsisikway ha imo.

⁷Pinanmatay nira an amon mga tawo ngan ginbungkag an amon nasod.

⁸Ayaw kami pagkastigoha tungod han mga sala han amon kaapoy-apoyan, kundi kalooyi kami yana, kay waray na gud kami paglaom.

⁹Buligi kami, O Dyos nga amon magtaralwas, tungod han imo kalugaringon nga kadungganan; bawia kami ngan pasayloa an amon mga sala, basi pagdayawon ka han mga tawo.

¹⁰Kay ano nga mapakiana ha amon an mga nasod, “Hain man an iyo Dyos?” Pakitaa kami han imo pagkastigo han mga nasod tungod han ira pagpaawas han dugo ha imo mga surugoon!

¹¹Pamatii an mga pag-araba han mga binilanggo, ngan talwasa pinaagi han imo dako nga gahom adton mga sinirotan hin kamatayon.

¹²O Ginoo, bulsa hin pito ka pilo an iba nga mga nasod, tungod han ngatanan nga ira mga pagyubit ha imo.

¹³Ngan kami nga imo mga tawo, an kakarnerohan han imo panon, magpapasalamat ha imo hin kadayonan, ngan magdadayaw ha imo ha ngatanan nga panahon nga tiarabot.