Read Waray Samarenyo Meaning Based Mga Salmo 81 Bible Online

Mga Salmo 81 - Waray Samarenyo Meaning Based bible

Mga Salmo 81

¹[153] Goliat hin kalipay ha Dyos nga aton mananalipod; pagkanta hin mga pagdayaw ngadto han Dyos ni Jacob!

²Tikangi an tokar ngan tokari an mga tamborin, pagtokar hin matahom nga tokar ha mga arpa ngan mga salteryo.

³Huypa an budyong para han pyesta; kon bag-o an bulan ngan kon kadayaw ito.

⁴Amo ini an balaod ha Israel, usa nga sugo tikang han Dyos ni Jacob.

⁵Iginsugo niya ito ha mga tawo han Israel, han pagsulonga niya han tuna han Ehipto. Nabati ako hin diri kinikilala nga tingog nga nasiring,

⁶“Ginkuha ko ha iyo an magbug-at nga mga pinas-an; iginpabutang ko ha iyo an iyo mga alat.

⁷Nagtawag kamo ha akon ngan gintalwas ko kamo han nakada kamo ha kakurian. Ginbaton ko kamo tikang han akon taragoan dida han bagyo; Ginpruybahan ko kamo didto han mga sapa ha Meriba.

⁸Pamati han akon pahimangno, akon katawhan; O Israel, karuyag ko unta nga mamati kamo ha akon!

⁹Kinahanglan diri gud kamo mag-alagad hin langyaw nga diyos, o magsingba kan bisan hin-o gawas ha akon.

¹⁰Amo ako an GINOO nga imo Dyos nga nagpagawas ha imo han tuna han Ehipto. Nganga ngan huhungiton ko ikaw.

¹¹“Kundi waray gud mamati ha akon an akon katawhan; waray gud magsugot ha akon an Israel.

¹²Sanglit ginpasagdan ko hira han ira kamasupakon ngan tinugotan pagbuhat han ira kinaruruyag.

¹³Ungara ko gud unta nga mamati ha akon an akon katawhan; Ungara ko gud unta nga magsugot hira ha akon!

¹⁴Pipirdehon ko dayon an ira mga kaaway ngan dadag-on an ngatanan nga ira mga pangontra.

¹⁵Mayukbo hin kahadlok ha akon atubangan adton mga nagdudumot ha akon; mawawaray kataposan an ira kastigo.

¹⁶Pakakaonon ko ikaw han gimamaupayi nga trigo ngan patutunghon ko ikaw hin ihalas nga dugos.”