Read Waray Samarenyo Meaning Based Mga Salmo 84 Bible Online

Mga Salmo 84 - Waray Samarenyo Meaning Based bible

Mga Salmo 84

¹[156] Hin kahinigugma ko han imo Templo, O GINOO, Labi Kamakagarahum nimo!

²Duro na gud an akon pag-ikaradto, nahihidlaw ako han mga ruwang mo. Mga ruwang hadton Templo han GINOO amo'n ginhihingyap han kinabuhi ko. Hin malipayon gud magkakanta ako, ngadto hadton Dyos nga buhi hin tutoo!

³Bisan katamsihan may-ada urokyan, mga balinsasayaw nagsasalag man. Ha may altar piso nira ginmangnoan, Dyos, Hadi, GINOO Gamhanan han 'tanan.

⁴Pagkamalipayon, hin pagkapalaran, adto hira nga im' templo an urokyan! Dayuday ikaw nira ginkakantahan, ha im' nag-aawit mga padayaw man!

⁵Hin pagkapalaran, pagkamalipayon han may kusog nga tikang ha im' naangkon; an may'da kasindak hin paglinakaton, ha dalan tikadto ha Bukid Sion!

⁶Samtang hira nagdayon ha paglalaktan, paglatas hadton patag han kamamad-an; nagin dapit adto'n mga katubigan, luob hin lanaw han temprano nga uran.

⁷Nagtitikakusog, waray maluyahon, samtang naglalakat hira pagpadayon; Dyos han mga diyos ira kikitaon, didto hadton dapit nga Bukid Sion.

⁸Dyos ni Jacob, pag-ampo ko pamatian, O Dyos, nga Dyos nga Gamhanan han Ngatanan.

⁹Amon hadi, O Dyos, tagi'n kalipayan, hadi nga pinili, imo dinihogan.

¹⁰An usa ka adlaw dida han im' Templo, labaw pa hin yukot dit' ha gawas hito; gabay ha porta han balay han Dyos ako kay ha balay han magraot ak' magpuyo.

¹¹GINOO an panalipod, arayopan, ngan amo an aton hadi nga gamhanan; an nahatag ha aton hin kaupayan, hin mga kalooy ngan hin kadungganan. Waray maupay nga iya pinupugngan hadton mga magtadong an binuhatan.

¹²Palaran an tawo kanay sariganan Ikaw nga Dyos nga Gamhanan han Ngatanan.