Read Waray Samarenyo Meaning Based Mga Salmo 85 Bible Online

Mga Salmo 85 - Waray Samarenyo Meaning Based bible

Mga Salmo 85

¹[157] GINOO, an imo tuna imo kinalooyan, an Israel ibinalik mo liwat han iya kauswagan.

²Ginpasaylo nimo an mga sala han imo katawhan, sugad man an ira mga magraot nga binuhatan.

³Inmundang ka ha ira hin kasina, an imo kapungot waray mo ipadapat ha ira.

⁴O Dyos, magtaralwas, kami ha imo pabalika, an imo kabido ha amon ihunong na.

⁵An imo kasina, waray ba katapos ha amon? Ngan an imo ba pagdumot ha amon magpapadayon?

⁶Pagbag-oha gad inin kusog namon, ngan amon ka gud pagdadayawon.

⁷Ha amon ipakita an gugma nga dayon, GINOO, ihatag ha amon an bulig mo nga matalwason.

⁸Namamati ako han kanan Dyos mga pulong, nga nasaad hin kalinaw ug kadait ha aton; kon kita diri han maraot nga paagi magpadayon.

⁹Waray ruhaduha hin pagtalwas hiya andam, hadton nahatag ha iya hin kadungganan; ngan aanhi an iya katalwasan, magpapabilin ha aton katunaan.

¹⁰Magtatapo an gugma ug an kamatinumanon, maghahangkopay an kalinaw ug an kamatadong;

¹¹Tikang ha tuna an kamatinumanon, tikang ha langit an pagpamatadong.

¹²An GINOO an magpapauswag ha aton, ngan mahatag an tuna hin hura nga aranihon.

¹³Mag-uuna han GINOO an pagkamatadong, ngan mag-aandam han dalan para ha aton.