Read Waray Samarenyo Meaning Based Mga Salmo 89 Bible Online

Mga Salmo 89 - Waray Samarenyo Meaning Based bible

Mga Salmo 89

¹[164] O GINOO, pirme ako magkakanta, hadton imo dayuday nga paghigugma; igsasangyaw hin dayon han akon baba an imo pagkamatinumanon manta.

²Maaram gad ako nga magpapadayon, an im' gugma ha ngatanan nga panahon; nga adton imo pagkamatinumanon, sugad gud han langit kamapidayonon.

³Siring mo, “Naghimo ak' hin ginsaaran, kaupod han tawo nga ak' ginpili man; ngan may-ada tawo nga ak' ginsaaran, nga ak' surugoon nga David an ngaran.

⁴Usa hadton imo mga katulinan, an pirme maghahadi ha kadayonan; ngan padayon ko gud nga pananalipdan, an imo panimalay hin kahadian.”

⁵Nagkakanta adton mga kalangitan, han im' urosahon mga binuhatan; ira ginkakanta ha mga baraan, adton im' pagkamatinumanon gudman.

⁶Ha bug-os nga kalangitan, O GINOO, waray bisan usa nga sugad ha imo; waray han langitnon nga binuhat mo, nga ha imo gud magigin kapareho.

⁷Amo ikaw adton gintatahod gudman, didto han konsilyo han mga baraan; ikaw amo'n dako ngan makalilisang, nga angay gud kahadlokan han ngatanan.

⁸O Dyos nga Makagarahum han Ngatanan, waray gud masugad ha im' kagamhanan; dida hadton mga butang gud ngatanan, O GINOO matinumanon ka gudman.

⁹Im' ginhahadian dagat nga gamhanan, im' ginpalinaw rumpat han kabaloran.

¹⁰Rahab[165] nga higante hadton kadagatan, imo ini ginpatay gindugmok gudman. Pinaagi han im' kusog nga gamhanan, mga kaaway mo ginpirde mo gudman.

¹¹Imo inin tuna pati kalangitan, tanan butang hini imo hinimoan.

¹²Im' buhat an amihanan ug timogan, Tabor, Hermon malipay 'kaw kakantahan.

¹³Hin pagkamakagarahum nimo gudman! Hin pagkadako gud han im' pagkakusgan.

¹⁴Igintitindog an imo ginhadian, dida han hustisya ngan han katadongan; an pagkamatinumanon ngan gugma man, ha ngatanan nga buhat mo hinkikit-an.

¹⁵Hin pagkamalipayon han mga tawo, nga nagkakaranta pagsingba ha imo; adto hira nga aada pagpupuyo, dida han kalamrag han pagkalooy mo!

¹⁶Tungod ha imo hira nagmamalipayon, ha bug-os gud nga takna han kaadlawon; ngan ira ka pirme nga pagdadayawon, tungod hadton imo pagkamaupayon.

¹⁷Kami amo an imo ginhahatagan, hin dagko nimo nga mga pagdarag-an; imo kami ginhihimo nga daogan, dida hadton imo paghigugma gudman.

¹⁸Ikaw, O GINOO, amo an nagpili, hin mananalipod tinagan mo kami; an Baraan nga Dyos han Israel ngani, amo an naghatag ha amon hin hadi.

¹⁹Siring mo ha dugay na nga panan-awon, ha matinumanon mo nga surugoon, “Usa ka tawo an akon ginbuligan, usa hiya nga sondalo nga bantogan. Han trono amo h'ya an akon gintagan, akon ginpili h'ya tikang han katawhan.

²⁰Akon surugoon David ginpili ko, ngan h'ya an ginhimo ko nga hadi niyo.

²¹Akon kusog pirme mag-upod ha iya, akon gahom magin kusog pa gud niya.

²²Di' mag-uswag ha iya'n iya pangontra, han mga magroat di' mapirde hiya.

²³Iya mga kaaway ak' dudugmokon, an nagdumot ha iya pagpapatayon.

²⁴Ha iya ak' mahigugma ngan maunong, akon hiya dayuday pagpapadag-on.

²⁵Ak' paaabotan iya ginhadian, tikang ha Eufrates nga't han kadagatan.

²⁶‘Ikaw akon amay,’ sidngon ako niya, ‘Akon Dyos, panalipod, magtaralwas pa.’

²⁷Suhag nga ak' anak h'ya ak' hihimoon, tanan kahadian hiya'n palalabwon.

²⁸Saad ko ha iya pirme tutumanon, ak' ginsaaran ha iya magpadayon.

²⁹Panimalay niya kanan kahadian, magdadayon sugad hadton kalangitan; dida hadton iya mga katulinan, pirme may'da usa nga maghahadi man.

³⁰“Kundi kon an iya mga katulinan, han akon balaod diri na magtuman; ngan kon diri nagud hira nga magpuyo, sumala han akon mga iginsugo,

³¹kon ak' mga tugon di' na pagbalihon, ngan ak' kasugoanan di' na tumanon;

³²niyan akon hira pagkakastigohon, tungod hadton ira pagkamasal-anon. Akon hira pagpapaantoson gudman, tungod hadton ira mga kasaypanan;

³³Kundi gugma ko ha iya di' maundang, saad ko ha iya diri makakawang.

³⁴Di' ko pag-uutdon o pagsusupakon, adton ginsaaran mga ginbuhat namon; ngan diri ko manta nga pagbabakwion, bisan usa hadton ginsaaran namon.

³⁵“Makausa ngan para han kadayonan, nagsaad ak' ha baraan ko nga ngaran; diri ko hi David pagbibinuwaan,

³⁶pirme manta hiya may'da katulinan. Ngan ak' babantayan iya ginhadian, samtang aada pa an adlaw nasirang.

³⁷Magpapadayon it' sugad hadton bulan, ngan tangkod nga saksi dit' ha kalangitan.”

³⁸Kundi pili mo nga hadi im' nangalsan, ngan im' hiya ginsikway ngan ginbayaan.

³⁹Imo iginsikway iyo ginsaaran, korona n'ya ginlahog ha kahugawan.

⁴⁰Imo ginrumpag an iya kapaderan, ginwakay an iya mga arayopan.

⁴¹Hiya han lumalabay ginkakawatan, han 'ya kahigrani gintitinawaan.

⁴²Iya mga kaaway im' ginpadaog, hira gud ngatanan imo ginlipay gud.

⁴³Im' ginwaray pulos iya hinganiban, ngan ginpapirde mo dit' ha pag-awayan.

⁴⁴Han iya sitro[166] im' hiya ginkuhaan, an iya trono ha tuna im' ginpukan.

⁴⁵Ha di' pa panahon im' h'ya gintigurang, ngan imo pa hiya ginpakaalohan.

⁴⁶Padayon ba'n pagtago mo, O GINOO? Tubtob san-o'n paglaga han kasina mo?

⁴⁷Dumdoma halipot la'n kinabuhi ko, tanan mamaratyon an imo ginhimo!

⁴⁸Hin-o'n mabubuhi nga di' gud mapatay? Uunanhon han lubnganan makalikay?

⁴⁹O GINOO, hain naman adton una nga mga pruyba han imo paghigugma? Hain naman adton mga ginsaaran nga ngadto kan David imo ginsumpaan?

⁵⁰Ayaw hingalimti kon inuunan-o an pagyubit ha ak' nga surugoon mo. Kon gin-uunan-o an pagpailob ko, han ngatanan nga pagtamay[167] han pagano.

⁵¹Ginyuyubit gud han mga kaaway mo, an im' ginpili nga hadi, O GINOO! Ira gudman hiya nga gin-iinsulto, ha bis' diin nga dapit h'ya napakadto.

⁵²Pagdayawon la gihapon an GINOO hin kadayonan. Amen! Unta mahimo!