Read Waray Samarenyo Meaning Based Mga Salmo 90 Bible Online

Mga Salmo 90 - Waray Samarenyo Meaning Based bible

Mga Salmo 90

¹[168] Pirme ka, Ginoo, nga amon puroy-anan.

²Han waray pa nimo himoa an kabukiran, han waray pa mahimugso an kalibutan, Dyos ka, waray tinikangan ug ha kadayonan.

³Imo ginsugo pagpabalik an mga tawo, ha daan niya nga kahimtang nga tapotapo.

⁴Yukot nga mga tuig ha imo pagtan-aw, sugad la hira hin usa ka adlaw. Sugad hin kakulop nga linmabay na, sugad hin takna ha gab-i nga pag-agma.

⁵Imo mga tawo dinhe kinukuha, gin-aanod kami sugad la hin baha; kinabuhi namon diri nag-iiha, sugad la hin inop kon naaga na. Sugad la kami hadton mga banwa, nga natumos dida hiton aga.

⁶Natubo, nabuswak, ngan nabukad hira, ha pagkagab-i narapdag, nalalaya.

⁷Napupuo kami han imo kasina, nalilisang kami kon napupungot ka.

⁸Ha imo atubangan aada an amon mga sala, waray natatago, imo ngatanan kinikita.

⁹Halipot an amon kinabuhi tungod han imo kasina, sugad hin huring, nagpapapas dayon, nawawara.

¹⁰Sitenta ka tuig amon aabuton, bangin otsenta kon may kusog pa namon; kundi puno ini hin kasamok, kagul-anan, niyan natatapos, waray na hinkikit-an.

¹¹Hin-o an sayod han imo kasina? Kon an kahadlok nga iya madadara?

¹²Itutdo nga lumalabay la an kinabuhi, basi mamay-ada kinaadman kami.

¹³Tubtob san-o an imo kasina ha amon, GINOO, kalooyi an mga surugoon nimo.

¹⁴Kada aga pun-a kami han imo gugma, basi kami ha imo dayuday magkanta.

¹⁵Tagi kami yana hin mga kalipayan, nga sukol han amon mga kabidoan; han naglabay nga mga katuigan.

¹⁶Pakitaa kami, imo mga surugoon, hadton mga buhat mo nga urosahon; amon katulinan imo pakitaon, hadton imo dako nga pagkaharangdon.

¹⁷GINOO, amon Dyos, ibilin an imo bendisyon, basi an amon mga buhat magmainuswagon.