Read Waray Samarenyo Meaning Based Mga Salmo 96 Bible Online

Mga Salmo 96 - Waray Samarenyo Meaning Based bible

Mga Salmo 96

¹Kanta ha GINOO hin bag-o nga kanta! Kanta ha GINOO, an bug-os nga tuna!

²Kanta ha GINOO, pagdayawa hiya! Kada adlaw sumat katalwasan niya.

³Ha kanasoran iyo igpakilala iya pagkaharangdon, iya himaya, ngan an mga gamhanan nga buhat niya ha ngatanan nga katawhan han tuna.

⁴An GINOO dako nga pagkaharangdon, ngan kinahanglan gud hiya pagdayawon. Angay gudman hiya nga pagpasidunggan labaw han ngatanan gud nga kadiyosan.

⁵Mga ladawan gud la an kadiyosan han ngatanan gud nga kanasoran. Kundi an GINOO hiya amo gudman an naghimo han bug-os nga kalangitan.

⁶Pagkadungganan ha iya nag-alirong, sugad man an iya nga pagkaharangdon; ha iya Templo amo an nagpupuno an iya kaanyag ngan gahom nga dako.

⁷Dayawa'n GINOO, katawhan ha tuna, dayawa an iya gahom ug himaya.

⁸Dayawa'n mahimayaon ngaran niya, didto han iya Templo paghalaran ta.

⁹Yukbo kamo ha iya gud atubangan, kon pumakita[172] an Labi Kabaraan; panngurog ha iya kamo gud ngatanan, ngatanan nga katawhan ha kalibutan.

¹⁰Sidnga'n kanasoran, “GINOO hadi na! An kalibutan ginpahimutang niya. Diri mabantad kay iya ginparig-on, katawhan paghuhukman gud hin matadong.”

¹¹Pagkalipay kamo, tuna, kalangitan! Uwang, dagat, ug binuhat ha imo man;

¹²pagkalipay kamo nga mga kaumhan, ngan mga binuhat ha imo ngatanan. Niyan magrarayhak tanan kakahoyan

¹³ha GINOO kay maabot hiya gud man, katawhan ha tuna iya paghadian han pagkamatadong ngan kamatuoran.