Read Waray Samarenyo Meaning Based Mga Darahonon 10 Bible Online

Mga Darahonon 10 - Waray Samarenyo Meaning Based bible

Mga Darahonon 10

¹Amo ini an mga darahonon ni Solomon: Nakakalipay han iya amay in usa nga anak nga makinaadmananon; nakakabido han iya nanay in anak nga lurong.

²Diri makakaupay ha imo in manggad nga imo naangkon pinaagi hin limbong, kundi makakatalwas han imo kinabuhi an pagkatangkod.

³Diri an GINOO matugot nga panggutomon an mag-upay nga mga tawo, ngan diri hiya matugot nga an mga magraot makaangkon han ira mga ungara.

⁴Makakapobre ha imo an pagkahubya, kundi makakapariko ha imo an pagkamaduruto.

⁵An tawo nga may buot nag-aandam hin paghipos han mga abot kon maabot na an igo nga panahon; kundi makaarawod an pagkinaturog kon panahon na hin kat-ani.

⁶An tawo nga maupay makarawat hin mga kaupayan. An mga pulong hin maraogdaog nga tawo nakakatahob han maisog nga iya kinaiya.

⁷Hinunumdoman nga usa nga bendisyon an mag-upay nga mga tawo, kundi an mga magraot hingangalimtan dayon.

⁸Nakarawat hin maupay nga sagdon an tawo nga may buot. Maghihikaraot an mga tawo nga nagyayakan hin linurong.

⁹Waray kataragman an tangkod nga mga tawo, kundi hidadakpan an mga maglimbong.

¹⁰Nakakasamok an tawo nga nagtatago han kamatuoran, kundi an nagsususon hin dayag nakakahatag hin kalinaw.[9]

¹¹Burabod hin kinabuhi an mga pulong hin maupay nga tawo, kundi an mga pulong hin maraogdaog nga tawo nakakatahob han maisog nga iya kinaiya.

¹²An pagdumot nag-aaghat hin kasamokan, kundi an gugma nagpapasaylo han ngatanan nga mga sayop.

¹³Suloran an mga pulong hin tawo nga maaram, kundi an lurong nga mga tawo angay pagkastigohon.

¹⁴Nagtitirok an mga makinaadmananon han ngatanan nga hibaro nga ira maaangkon, kundi diri hirayo an kasamok kon nagyayakan in mga lurong.

¹⁵An manggad nananalipod han mga riko; an kakablasan nagbubungkag han mga pobre.

¹⁶Kinabuhi an balos hin pagbuhat hin maupay, kundi an sala nag-aaghat hin pagbuhat pa hin darudamo nga sala.

¹⁷Mabubuhi an mga tawo nga namamati kon hira ginwawaydongan, kundi aada ha kataragman adton diri natangdo nga sayop hira.

¹⁸Buwaon hiya nga tawo, an nagtatago han iya pagdumot; lurong an bisan hin-o nga naglilibak.

¹⁹Kon magpatakas ka hin pagyinakan, madagmit ka makasala. Kon makinaadmananon ka, mahilom ka la.

²⁰Sugad hin puraw nga salapi an mga pulong hin maupay nga tawo; waray pulos an mga panhunahuna hin maraot nga tawo.

²¹Nakakabulig hin damo nga mga tawo an mga pulong hin tawo nga maupay, kundi makakamatay ha imo ngahaw an kalurongan.

²²Nakakapariko ha imo an bendisyon han GINOO, an imo kamakugi diri nakakadugang han imo karikohan.[10]

²³Lurong an nalilipay hin pagbuhat hin kasaypanan. Ikinalilipay an kinaadman han mga tawo nga mag-aram.

²⁴Naaangkon han magtadong an ira ungara, kundi maaangkon han magraot an ira gud kinahahadlokan.

²⁵Iginpapalid an mga magraot kon naabot an mga bagyo, kundi dayuday murayaw an kamutangan han tangkod nga mga tawo.

²⁶Ayaw papagtrabahoa ha imo an hubya nga tawo; mangilo hiya sugad hin suoy ha imo mga ngipon o mahapdos hiya sugad hin aso ha imo mga mata.

²⁷Tahora an GINOO ngan mahilawig an imo kinabuhi. Napatay dayon an mga magraot ha diri pa nira panahon.

²⁸An mga paglaom han mga mag-upay nagdadalan ngadto ha kalipayan, kundi an mga magraot waray gud nira sadang paglauman.

²⁹Pinananalipdan han GINOO an tangkod nga mga tawo, kundi iya ginpupuo adton mga nagbubuhat hin kasaypanan.

³⁰An magtadong nga mga tawo dayuday nag-uokoy ha kalinaw, kundi an mga magraot diri mabubuhi ha tuna.

³¹An mga magtadong nagyayakan hin kinaadman, kundi diri tutugotan an dila nga magyakan hin maraot.

³²Maaram an mga magtadong han angay pagyaknon, kundi dayuday nakakabido an mga pulong han maraogdaog nga mga tawo.