Read Waray Samarenyo Meaning Based Mga Darahonon 12 Bible Online

Mga Darahonon 12 - Waray Samarenyo Meaning Based bible

Mga Darahonon 12

¹An bisan hin-o nga mahigugma hin hibaro naruruyag nga pagsagdonan hiya kon hiya makasala. Lurong an tawo nga napupungot kon ginsasagdonan hiya.

²Nalilipay an GINOO han mag-upay nga mga tawo, kundi sinisirotan niya adton mga naglalarang hin maraot.

³Diri nakakahatag hin karig-onan an pagkamaraot, kundi marig-on gud an magtadong nga mga tawo.

⁴An maupay nga asawa amo an parayaw ngan kalipay han iya bana; kundi an asawa nga nagpapakaalo han iya bana sugad hin kanser ha iya mga tul-an.

⁵Maupay magdumara ha imo an tangkod nga mga tawo; karuyag la han mga magraot an paglimbong ha imo.

⁶Makamaratay an mga pulong han mga magraot, kundi an mga pulong han mga magtadong nakakatalwas hadton mga gintatarhog.

⁷Napupukan an mga magraot nga tawo ngan waray nabibilin han ira mga tulin, kundi nagpapadayon an mga panimalay han mga magtadong.

⁸Pagdadayawon ka kon ikaw masinaboton; kundi pagtatamayon ka, kon usa ka nga lurong.

⁹Mauruupay pa an kablas nga pagkatawo nga magbubudlay basi mabuhi, kay han nagpapakamay-ada kundi ginugutom.

¹⁰Nagmamangno an maupay nga tawo han iya kahayopan, kundi an mga magraot nga tawo waray kalooy han ira ginmamangnoan.

¹¹Damo an pagkaon han parauma nga maduruto, kundi an lurong nga tawo nagkakarag hin panahon dida hin waray pulos nga mga trabaho.

¹²Karuyag la han mga magraot an pagbiling hin magraot nga mga buruhaton, kundi makuri mawaring an mga magtadong.[15]

¹³Nabibitik an maraot nga tawo pinaagi han iya kalugaringon nga mga pulong, kundi nahigagawas hin kasamokan an tawo nga tangkod.

¹⁴Nasandig an imo balos dida han imo pulong ngan han imo buhat; makarawat ka han angay ha imo.

¹⁵Naghuhunahuna an mga lurong nga tawo nga matadong an ira ginbubuhat. Namamati hin sagdon an mga makinaadmananon.

¹⁶Kon nauurit in usa nga lurong, iya iginpapahibaro ini dayon, kundi an pagtamay waray la bali para hin tawo nga maaram.

¹⁷Kon nagsusumat ka han kamatuoran, natutuman an katadongan, kundi kon nagbibinuwa ka, gintatamay mo an pagkamatadong.

¹⁸Sugad hin espada nakakasamad hin grabe an dinalidali nga mga pulong, kundi nakakatambal an mga pulong hin makinaadmananon.

¹⁹An buwa diri gud nag-iiha, kundi mabubuhi ha kadayonan an kamatuoran.

²⁰Naglilimbong ha ira la kalugaringon adton mga naglalarang hin karat-an, kundi adton mga nagbubuhat hin maupay makakaangkon hin kalipay.

²¹Waray nahinanabo nga maraot ngadto han magtadong nga mga tawo, kundi waray gud naaangkon an magraot kon diri an kakurian.

²²Napupungtan han GINOO an mga buwaon, kundi nalilipayan adton mga nagtutuman han ira pulong.

²³Ginhihilom han mga mag-aram an ira hinbabaroan, kundi iginpapasangyaw han mga lurong an ira kalurongan.

²⁴Mahatag ha imo hin gahom an pagkamaduruto, kundi makakapaoripon ha imo an pagkahubya.

²⁵Makakapaguol ha imo an pagkabaraka, kundi makakalipay ha imo an manamit nga mga pulong.

²⁶Mag-uruna han iya sangkay an matadong nga tawo, kundi nakakapasimang ha ira an aragianan han mga magraot.

²⁷Kon hubya ka nga tawo, diri mo gud maaangkon an imo gintutuyo, kundi maaangkon mo in manggad kon ikaw maduruto.[16]

²⁸Dalan ngadto ha kinabuhi an pagkamatadong; kundi an pagkamaraot[17] dalan ngadto ha kamatayon.