Read Waray Samarenyo Meaning Based Mga Darahonon 13 Bible Online

Mga Darahonon 13 - Waray Samarenyo Meaning Based bible

Mga Darahonon 13

¹Namamati an anak nga makinaadmananon han kanan iya amay pagwaydong, kundi diri gud natangdo nga sayop hiya an mapahitas-on.

²Binabalos an mga mag-upay tungod han ira mag-upay nga mga pulong, kundi nagbibiling hin kasamok adton mga maglimbong.

³Hiroti an imo iginyayakan ngan mapapanalipdan an imo kinabuhi. An nagpapasagad la hin pagyinakan, nagsasamad la ha iya ngahaw.

⁴Bisan diunan-o an pagkinaruyag hin usa nga hubya, diri gud ini niya makukuha. Maaangkon han maduruto an ngatanan nga iya mga ungara.

⁵Nadiri hin mga buwa an tangkod nga mga tawo, kundi an mga pulong han mga magraogdaog nga tawo makaarawod ngan makaaralo.

⁶Nananalipod han mga waray sala an pagkamatadong, kundi an pagkamaraogdaog amo an pagkapukan han mga makasasala.

⁷May mga tawo nga napakariko kundi waray nira bisan ano. Napakapobre la an iba bisan kon may-ada manggad nira.

⁸Nagamit han iya kwarta in usa nga riko hin pagpanalipod han iya kinabuhi, kundi waray nagtatarhog hin kablas nga tawo.

⁹Sugad hin suga nga malamrag an mga magtadong; sugad an mga magraot hin suga nga tikapaparong.

¹⁰Kasamokan la an nahihimo han mapahitas-on. Mauruupay pa an pangaro hin sagdon.

¹¹Kon masayon an pakaangkon mo han imo manggad, madali man ini nimo mawara. Kon ginbalhasan mo an imo pagpatigayon, darudamo an imo maaangkon.

¹²Kon nakakawang an paglaom, nasasamad an kasingkasing, kundi nagmamalipayon ka kon natutuman an imo ungara.

¹³Kon isalikway mo an maupay nga sagdon, nagbibiling ka hin kasamokan; sunda an maupay nga sagdon ngan waray mo kahahadlokan.

¹⁴Burabod hin kinabuhi an mga pagturon-an han makinaadmananon; makakabulig ini ha imo hin paglikay kon aada ka ha kataragman.

¹⁵Nakakaaghat hin pagtahod an pagkamaaram, kundi adton mga diri kasasarigan aada ha dalan tipakadto ha pagkapukan.[18]

¹⁶Dayuday nanhuhunahuna anay an mga tawo nga may buot san-o hira magbuhat, kundi iginpapasangyaw han mga lurong an ira pagkatapang.

¹⁷Nakakahatag hin kasamokan in mga sinugo nga diri katataporan, kundi nagdadara hin kalinaw adton mga kasasarigan.

¹⁸An nadiri hin pag-aram, mapopobre ngan maaalohan, kundi an namamati hin waydong pagpapasidunggan.

¹⁹Hin kamaupay kon an imo ungara natutuman! Nadiri an mga lurong hin pagbaya han karat-an.

²⁰Pakig-upod-upod han mga makinaadmananon ngan magmamakinaadmananon ka. Kon makigsangkay ka hin mga lurong, maghihikaraot ka.

²¹Nasunod an kasamokan bisan pumakain an mga makasasala, kundi pagbabaloson hin mga kaupayan an mga magtadong.

²²An tawo nga maupay may manggad nga ibibilin han iya kaapohan, kundi an kanan makasasala manggad mahingangadto han mga magtadong.

²³Damo nga pagkaon para han mga pobre an makukuha dida hin waray pag-umha nga tuna, kay ginpupudngan man ini nga pag-umhan han magraot nga mga tawo.[19]

²⁴Kon diri mo kastigohon an imo anak, diri ka nahigugma ha iya. Kon nahigugma ka ha iya, pagwawaydongan mo hiya.

²⁵May igo nga pagkaon an mga magtadong, kundi an mga magraot dayuday ginugutom.