Read Waray Samarenyo Meaning Based Mga Darahonon 14 Bible Online

Mga Darahonon 14 - Waray Samarenyo Meaning Based bible

Mga Darahonon 14

¹Maupay an pagdumara han mga panimalay tungod han kinaadman han kababayen-an, kundi nabubungkag ini pinaagi hin kalurongan.

²Pagtangkod ngan nagpapakita ka nga may pagtahod ka han GINOO. Pagmalimbong ngan nagpapakita ka nga gintatamay mo hiya.

³Nagpapatakas hin pagyinakan an mapinahitas-on nga lurong; napapanalipdan in makinaadmananon tungod an iya mga pulong.

⁴Mawawaray sulod an imo buhos, kon waray kabakahan nga mag-aarado, kundi kon may mga baka, mapupuno ini hin inani nga abot.[20]

⁵An tangkod nga testigo dayuday nagsusumat han kamatuoran, kundi an diri kasasarigan nga testigo pagbinuwa la an nahihimo.

⁶Diri gud magmamakinaadmananon an parayawnon nga mga tawo, kundi an mga masinaboton masayon la mahibaro.

⁷Pahirayo han lurong nga mga tawo; waray gud nira mahitututdo ha imo.

⁸Kay ano nga makinaadmananon an listo nga tawo? Kay maaram hiya han angay pagbuhaton. Kay ano nga danay malurong in tawo? Kay naghuhunahuna hiya nga hiya la an maaram.

⁹Diri nababaraka an mga lurong kon nakakasala hira, kundi an mga mag-upay naruruyag nga pasayloon.[21]

¹⁰Imo kalugaringon an imo kalipay; sugad man an imo kabido. Waray tawo nga makakaangbit hini ha imo.

¹¹Matindog pa gihapon an balay hin tawo nga matadong katapos mabungkag an balay han tawo nga maraogdaog.

¹²An imo ginhuhunahuna nga matadong nga dalan, bangin kamatayon an hingangadtoan.

¹³Mahimo nga an pagtawa makatago hin kabidoan. Kon tapos na han kalipayan, aada la gihapon an kabidoan.

¹⁴Makarawat an magraot nga mga tawo han angay ha ira; babaloson an mag-upay nga mga tawo tungod han ira mga binuhatan.[22]

¹⁵Natuod hin bisan ano in usa nga lurong; kundi an mga mag-aram nagbabantay han ira mga pitad.

¹⁶Naghihirot hin kasamok an mga tawo nga may-ada buot, kundi an mga lurong diri naghihirot ngan diri naghuhunahuna anay.

¹⁷Mga linurong an binubuhat hin mga tawo nga mapaso an ulo, kundi mapinailobon[23] an mga makinaadmananon.

¹⁸Naaangkon han mga tapang an angay han ira kalurongan, kundi an mga listo binabalos hin hibaro.

¹⁹Mayukbo an mga magraot ngadto han mga magtadong, ngan makikimalooy ha ira nga mapinaubsanon.

²⁰Waray naruruyag hin kablas nga tawo, bisan an iya amyaw, kundi damo an kasangkayan han mga riko.

²¹Kon karuyag mo nga magmalipayon ka, kalooyi an mga kablasanon; sala an pagtamay bisan kan kanay.

²²Sasarigan ngan tatahoron ka han iba kon magbuhat ka hin kaupayan; nagsasayop ka kon magbuhat ka hin karat-an.

²³Pagkabudlay, ngan magkakamay-ada ka kabubuhian; kon lumingkod ka la ngan magyinakan, maiimo an kakablasan.

²⁴Binabalos hin manggad an mga makinaadmananon, kundi an mga lurong hinbabaroan pinaagi[24] han ira kalurongan.

²⁵Nagtatalwas hin mga kinabuhi in testigo nga nagsusumat han kamatuoran; naglilingo hiya hin mga tawo kon nagbibinuwa hiya.

²⁶An pagtahod han GINOO usa nga pagtapod ngan karig-onan han tawo ngan han iya panimalay.

²⁷Karuyag ka ba maglikay han kamatayon? Tahom an GINOO kay burabod hiya han kinabuhi.

²⁸An kanan hadi kagamhanan nasandig dida han kadamo han iya ginhahadian nga mga tawo; kon waray niya mga tawo, waray man hiya gahom.

²⁹Makinaadmananon ka kon ikaw mapinailobon, kundi kon pungtanaon ka, nagpapadayag ini han imo kalurong.

³⁰An murayaw nga hunahuna nakakaupay han panlawas, kundi an pangabugho sugad hin kanser.

³¹Kon ginraraogdaog mo an kablas nga mga tawo, gintatamay mo an Dyos nga naghimo ha ira; kundi an pagkalooy han mga pobre amo an pagpasidungog ha iya.

³²Napupukan an mga maraot pinaagi han ira magraot nga binuhatan, kundi pinananalipdan an mga mag-upay pinaagi han ira kamaligdong.[25]

³³Aada an kinaadman ha panhunahuna hin tawo nga maaram; waray gud[26] hinbabaroan an mga lurong hiunong han kinaadman.

³⁴An pagkamatadong nakakapakusog hin usa nga nasod, kundi an kasal-anan amo an kaarawdan hin bisan ano nga nasod.

³⁵Nakakalipay han kahadian an mag-aram nga mga opisyal, kundi kinakastigo nira adton mga nagpapakaalo ha ira.