Read Waray Samarenyo Meaning Based Mga Darahonon 15 Bible Online

Mga Darahonon 15 - Waray Samarenyo Meaning Based bible

Mga Darahonon 15

¹An malumo nga pagbaton nakakapahugpoy hin kasina, kundi an maisog nga mga pulong nakakaaghat la lugod.

²Kon nagyayakan an mga makinaadmananon, an ira hibaro nakakabihag hin mga tawo, kundi tinuyaw la an isinasagbang han mga lurong.

³Nakita an GINOO han nahinanabo ha ngatanan nga dapit; nakita hiya han aton ginbubuhat—magmaupay o magmaraot.

⁴Nahatag hin kinabuhi an maloloy-on nga mga pulong, kundi nakakasamad han imo kasingkasing an magpintas nga yayaknon.

⁵Linurong an pagpasibaya han igintutdo ha imo han imo amay; maupay gud an pagkarawat han iya mga sagdon.

⁶Hinihipos han mga magtadong an ira manggad, kundi nawawara an kanan mga magraot kon naabot an kakurian.

⁷Nagpapasarang hin hibaro an mga makinaadmananon, diri an mga lurong.

⁸Kon nag-aampo an mga mag-upay nalilipay an GINOO, kundi napupungot hiya han mga halad nga gindadara ha iya han magraot nga mga tawo.

⁹Napupungot an GINOO han mga paagi han magraot nga mga tawo, kundi nahigugma hiya hadton nagbubuhat hin matadong.

¹⁰Kakastigohon ka hin duro kon magbuhat ka hin kasaypanan; mapatay ka kon nadiri ka pamati hin sagdon.

¹¹Maaram gud an GINOO kon hin-o an aadto han kalibutan han mga patay; sanglit uunanhon hin usa ka tawo hin pakatago tikang han Dyos han iya mga panhunahuna?

¹²Diri napasagdon an mga parayawnon diri gud hira naaro hin sagdon hadton mga mas makinaadmananon.

¹³Mahiyomhiyom an mga tawo kon hira malipayon, kundi masulob-on pagkit-on kon hira mabidoon.

¹⁴Karuyag hin pag-aram an mga tawo nga mag-aram, kundi kontento la hin katapang an mga lurong.

¹⁵Dayuday nga paniguro an kinabuhi han mga tinamay nga mga tawo, kundi dayuday nagpapahimulos han ira kinabuhi an mga maglipayon.

¹⁶Gabay la makablas ngan may pagkahadlok han GINOO, kay han pagkariko ngan aada ha kasamokan.

¹⁷Gabay la kumaon hin utan nga kasaro an imo mga hinigugma, kay hin pagkaon hin karne an sora kundi aada an kapungot.

¹⁸An magpaso nga ulo amo an tinikangan hin lantugi, kundi nagdadara hin kalinaw an kamapailobon.

¹⁹Igkikita ka hin kakurian bisan diin kon ikaw hubya, kundi mawawaray mo kasamokan kon tangkod ka la.

²⁰Nakakalipay han iya amay an anak nga makinaadmananon; nagtatamay han iroy niya an tawo nga lurong.

²¹An mga tawo nga lurong nalilipay han ira kalurongan, kundi an mga makinaadmananon magbubuhat han matadong.

²²Pamatii an ngatanan nga sagdon nga ihahatag ha imo ngan magmamainuswagon ka; kon waray mo hini waray ka mahihimo.

²³Hin kamakalilipay kon hin-aagian an angay nga pulong para han angay nga panahon!

²⁴Naglalakat an mga makinaadmananon han dalan tipaigbaw ngadto ha kinabuhi, diri han dalan nga tipaubos ngadto ha kamatayon.

²⁵Gugub-on han GINOO an kabablayan han mga magpinahitas-on, kundi pananalipdan niya an hiagi hin usa nga balo.

²⁶Napupungot an GINOO han magraot nga mga panhunahuna, kundi nalilipay hiya han mga pulong nga makiaangayon.

²⁷An linimbong nga pinakabuhian nagdadara hin kasamok ha iya panimalay. Ayaw gud pagpahukip ngan mahilawig an imo kinabuhi.

²⁸Naghuhunahuna anay an mga mag-upay nga diri pa hira nabaton. Nakakasamok an mga magraot nga nasagbang la dayon.

²⁹Kon nag-aampo an mga magtadong namamati an GINOO, kundi pinapasibay-an niya adton magraot nga mga tawo.

³⁰Nakakalipay ha imo an maghiyomhiyom nga mga bayhon, ngan nakakaliaw ha imo an maupay nga sumat.

³¹Kon namamati ka hin mga waydong, usa ka nga makinaadmananon.

³²Kon nadiri ka pag-aram, gindadaot mo an imo kalugaringon. Kon nakarawat ka hin waydong, mahihimo ka nga makinaadmananon.

³³An pagtahod han GINOO amo in usa nga pag-aradman. Kinahanglan magmapinaubsanon ka san-o ka kumarawat hin kadungganan.