Read Waray Samarenyo Meaning Based Mga Darahonon 16 Bible Online

Mga Darahonon 16 - Waray Samarenyo Meaning Based bible

Mga Darahonon 16

¹Makakaghimo kita han aton mga larang, kundi an Dyos an may-ada kataposan nga pulong.[27]

²Makakahunahuna ka nga matadong an ngatanan nga imo binubuhat, kundi ginhuhukman han GINOO an imo katuyoanan.

³Hangyoa an GINOO nga bendisyonan niya an imo mga larang, ngan magmamainuswagon ka hini hin pagtuman.

⁴May sangputanan an ngatanan nga ginhimo han GINOO; ngan an pagkapukan an sangputanan han magraot nga mga tawo.

⁵Napupungot an GINOO han ngatanan nga mapahitas-on; diri gud hiya matugot nga diri hira pagkastigohon.

⁶Ayaw palingo ngan pagmatinumanon, ngan pasasayloon han Dyos an imo sala. Kahadloki an GINOO ngan waray maraot nga mahinanabo ha imo.

⁷Kon nakakalipay ka han GINOO, mahihimo mo[28] nga kasangkayan an imo mga kaaway.

⁸Gabay may-ada ka la gutiay nga maangkon mo ha tangkod nga pagpatigayon, kay hin dako nga kinikita ha paagi nga linimbong.

⁹Makakahimo ka han imo mga larang, kundi an Dyos an magbubuot han imo mga ginawian.

¹⁰Nagyayakan an hadi upod in gahom nga dyosnon; dayuday matadong an iya mga paghukom.

¹¹Karuyag han GINOO nga tuptop an mga timbangan ngan mga taraksan, ngan an pagbaligya makisubay han kaangayan.

¹²Diri an kahadian makakatugot hin pagbuhat hin maraot;[29] kay an pagkamatadong an nakakapakusog han pamunoan.

¹³Naruruyag in hadi hin pamati han kamatuoran; ngan hinihigugma niya adton mga nagyayakan hini.

¹⁴Magtitinguha hin pagpahalipay han hadi in usa nga makinaadmananon; kon mapungot an hadi, bangin may-ada niya patayon.

¹⁵Sugad han mga dampog nga nagdadara hin uran ha pag-abot han kathuraw an pagkalooy han hadi—aada an kinabuhi.

¹⁶Mauruupay pa gud han salapi ug bulawan an pag-angkon han hibaro ug kinaadman.

¹⁷Naglalakat an mga mag-upay ha dalan nga naglilikay han karat-an; sanglit bantayi an imo ginlalaktan ngan magtatalwas ini han imo kinabuhi.

¹⁸Nagdadalan an kamapahitas-on ngadto ha pagkapukan, ngan an kamalabyaw ngadto ha pagkabungkag.

¹⁹Mauruupay pa an kakablas ngan an pagpaubos kay hin pag-angbit han tinikas han mga mapahitas-on.

²⁰Pamatii an igintututdo ha imo ngan ikaw magmamainuswagon; sarigi an GINOO, ngan ikaw magmamalipayon.

²¹Kinikilala tungod han iya pagsabot an usa nga makinaadmananon; labi na nga nakakakabig hiya kon mag-upay an iya mga pulong.

²²An kinaadman amo an burabod hin kinabuhi para han mga makinaadmananon, kundi karag la nga panahon an pagtutdo hin mga lurong.

²³Nanhuhunahuna anay an mga mag-aram san-o hira magyakan; sanglit mas nakakakabig an ira iginyayakan.

²⁴Sugad hin dugos an mga pulong nga maloloy-on, matam-is ngan maupay ini para han imo panlawas.

²⁵An imo ginhuhunahuna nga matadong nga dalan bangin makagdara ha imo ngadto ha kamatayon.

²⁶Nakakapaduruto an gana hin usa nga magburudlay, kay karuyag niya pagbusgon an iya kagutom.

²⁷An magraot nga mga tawo nangingita hin mga paagi hin pagdaot hin iba; naglalaga hin karat-an bisan an ira mga pulong.

²⁸Ginpapasarang an paglibak hin magraot nga mga tawo; nag-aaghat hira hin kasamok ngan nakakautod hin pagkamagsarangkay.

²⁹Ginlilimbongan hin mag-isog nga mga tawo an ira kasangkayan ngan gindadara hira ngadto ha karat-an.

³⁰Pagtagam hin mga tawo nga nahiyom ngan nakiro ha iyo; ha luyo hini maraot an ira tuyo.

³¹An hilawig nga kinabuhi amo an balos han mga magtadong; korona hin kadungganan an pagkaubanon.

³²Mauruupay an pagkamapailobon kay han pagkagamhanan. Mauruupay an pagpugong han imo kalugaringon kay hin paghadi hin bug-os nga syudad.

³³Nagriripa an mga tawo basi mahibaro han kaburot-on han Dyos, kundi an Dyos ngahaw amo an nagbubuot hini.