Read Waray Samarenyo Meaning Based Mga Darahonon 17 Bible Online

Mga Darahonon 17 - Waray Samarenyo Meaning Based bible

Mga Darahonon 17

¹Mauruupay pa an pagkaon hin pangkag nga tinapay nga murayaw an imo hunahuna, kay hin pagkamay-ada kombite didto hin balay nga puno hin kasamokan.

²Pagbubut-an hin maaram nga surugoon an waray pulos nga anak han iya agaron, ngan makakaangbit hiya han panurondon.

³Sugad nga gin-pupurog an salapi ug bulawan pinaagi hin kalayo, amo man liwat an kasingkasing han tawo.

⁴Pinamamatian han magraot nga mga tawo an magraot nga mga hunahuna, ngan pinamamatian han mga buwaon an mga buwa.

⁵Kon pag-intrimisan mo an mga kablas, gintatamay mo an Dyos nga naghimo ha ira. Pagkakastigohon ka kon nalilipay ka han karat-an nga madangat han iba.

⁶Ipinaparayaw han mga kalagsan an ira kaapohan, sugad nga ipinaparayaw han mga anak an ira mga amay.

⁷Diri nagbubuwa an gintatahod nga mga tawo, ngan waray gud pulos nga ginyayakan an mga lurong.

⁸May mga tawo nga naghuhunahuna nga sugad hin anting-anting an usa nga hukip; natoo hira nga nakakahimo ini hin bisan ano.

⁹Kon karuyag mo nga karuyagon ka han mga tawo, pasayloa hira kon makasayop hira ha imo. An pagdumdum hin mga sayop nakakabungkag hin kamagsarangkay.

¹⁰Darudamo an hinbabaroan hin tawo nga maaram tikang hin usa nga pagbusa kay han hinbabaroan hin usa nga lurong tikang hin gatos nga hampak ha iya.

¹¹Maabot an kamatayon sugad hin maisog nga sinugo ngadto han mga magraot nga dayuday nag-aaghat hin kasamok.

¹²Mauruupay pa nga igkatapo ka hin uso nga kinawatan han iya mga nati, kay nga igkatapo ka hin lurong nga linurong an iya binubuhat.

¹³Kon baloson mo hin maraot an maupay, diri gud maiwas an karat-an ha imo balay.

¹⁴An pagtikang hin lantugi sugad han syahan nga pagkabulwang hin patubigan, saropa ini dayon nga diri pa ini nagtitikadako.

¹⁵An paghukom ha karat-an han waray sala o pagbuhi han salaan—ini nga duha nangangalsan han GINOO.

¹⁶Diri nakakaupay hin lurong an paggasto para hin pag-aram kay waray man niya sarabotan.

¹⁷Dayuday nagsisighigugmaay an mga magsarangkay. Ano ba an pagkamagburugto, kon diri an pag-inangbitay hin kakurian?

¹⁸An tawo la nga waray sarabotan an nagsasaad hin pagbayad han kanan iba mga utang.

¹⁹An naruruyag hin sala naruruyag hin kasamokan. Kon dayuday ka naghihinambog,[30] nagbibiling ka hin samok.

²⁰Bisan hin-o nga naghuhunahuna ngan nagyayakan hin maraot, waray gud kaupayan nga iya pagpapaaboton kundi karat-an la.

²¹Waray gud iba kondiri an kabidoan ug kasubo la para hin amay nga may anak nga nagbubuhat hin mga linurong.

²²Nakakapaupay han imo panlawas an pagkamalipayon. Mahinay nga kamatayon an dayuday nga pagkamasamdong.

²³Nakarawat an magraot nga mga maghurukom hin sekreto nga mga hukip, sanglit diri natutuman an katadongan.

²⁴Tinatadong han tawo nga maaram an maupay nga ginawian, kundi nakipat ha ngatanan nga dapit in usa nga lurong.

²⁵Nakakapabido han iya amay in anak nga lurong, ngan nakakapasubo hin mapait han iroy niya.

²⁶Diri matadong an pagmulta hin waray sala nga tawo; nasusuhi an katadongan kon kinakastigo an mga mag-upay.

²⁷An tawo nga may hibaro diri mayakan. An mga tawo nga murayaw an hunahuna may tinuod nga kaaram.

²⁸Bisan ngani an lurong, kon nahilom hiya ngan natak-om han iya baba, bangin paghunahunaon nga makinaadmananon ngan maaram.