Read Waray Samarenyo Meaning Based Mga Darahonon 19 Bible Online

Mga Darahonon 19 - Waray Samarenyo Meaning Based bible

Mga Darahonon 19

¹Mauruupay pa an pobre kundi tangkod nga tawo kay hin usa nga lurong nga buwaon.

²Diri maupay an kasindak nga waray hibaro; an kawaray pagpailob magdadara ha imo hin kasamok.

³May mga tawo nga naghihingaraot pinaagi han ira linurong nga mga ginawian, ngan katapos, an GINOO an ira ginbabasol.

⁴Pirme nakakaagi an mga riko hin bag-o nga kasangkayan, kundi masakot la bayaan an mga pobre han pipira la nga ira mga sangkay.

⁵Kakastigohon ka kon magbuwa ka didto ha hukmanan—diri ka gud makakalikay.

⁶Nagtitinguha an ngatanan hin pakigsangkay han mga dagko nga pagkatawo; nakikigsangkay an ngatanan hadton mga nahatag hin mga regalo.

⁷Bisan pa an kabugtoan hin pobre nga tawo diri ha iya nagkikinahanglan, diri urosahon nga waray gud niya kasangkayan. Bisan diunano an iya paniguro, waray gud niya iginkakasangkay.[33]

⁸Pagbuhati hin maupay an imo kalugaringon ngan pag-admi an ngatanan nga imo mahihimo; niyan hinumdomi an imo hinbabaroan ngan magmamainuswagon ka.

⁹Diri makakalikay han kastigo an tawo nga nagbibinuwa didto ha hukmanan; maghihikaraot gud hiya.

¹⁰Kinahanglan an mga lurong diri mag-ukoy ha kahuraan, ngan diri paghadian hin mga oripon an mga dagko nga pagkatawo.

¹¹Kon maupay an imo panhunahuna pagpupugngan mo an imo kasina. Kon may makasayop ha imo, dako ini nga kadungganan kon diri ka magsukmat ha iya.

¹²Sugad han ngurob hin liyon an kanan hadi kasina, kundi an iya pagkalooy sugad han ginpipinamulat nga uran.

¹³Makakadaot han iya amay an anak nga lurong. An asawa nga maaringasa ngan mamugo sugad hin tubig nga nagtitinuro.

¹⁴Makakapanunod in usa ka tawo hin balay ug kwarta tikang han iya mga kag-anak, kundi an GINOO la an makakahatag ha iya hin maupay nga asawa.

¹⁵Padayon hin paghinubya; padayon hin pagkaturog, kundi gugutomon ka.

¹⁶Tumana an mga balaod han Dyos ngan mabubuhi ka hin maiha; kon pagpasibay-an mo ini, mapatay ka.

¹⁷Kon nahatag ka ngadto han mga kablas sugad ini hin ginpapautang mo an GINOO, ngan an GINOO an mabayad ha imo.

¹⁸Tutdoi hin matadong an imo mga anak samtang bata pa ngan masayunay pa hira mahibaro. Kon diri mo ini pagbuhaton, binubuligan mo la hira hin pagdaot han ira kalugaringon.[34]

¹⁹Kon may tawo nga pungtanon, hiya an mabaton han iya dadangatan. Kon gawson mo hiya tikang ha kasamok makausa, kinahanglan nga pagbubuhaton mo liwat ini.[35]

²⁰Kon mamati ka hin sagdon ngan karuyag mo hin pag-aram, may adlaw nga maaangkon mo an kinaadman.

²¹Makakaglarang in mga tawo hin magkalainlain nga mga butang, kundi na kaburot-on la han GINOO amo an matutuman.

²²An pagkahalot usa nga kaarawdan;[36] mauruupay pa an mga kablas kay hin mga buwaon.

²³Pagtahora an GINOO ngan mabubuhi ka hin maiha, nga kontento ngan talwas tikang han mga kataragman.

²⁴May mga tawo nga uraura na hin kahubya bisan hin paghungit han pagkaon ha ira mga baba.

²⁵Kinahanglan pagkastigohon an nagpapalabilabi, basi mahibaro hin pagturon-an an mga tapang. Kon ikaw makinaadmananon mahibabaro ka kon ikaw pagsawayon.

²⁶An tawo la nga waray alo ngan waray batasan an magraraogdaog han iya tatay, o magpapaiwas han iya nanay tikang han iya panimalay.

²⁷Anak ko, kon umundang ka hin pag-aram, diri maiha imo papabay-an an imo na hinbaroan.

²⁸Waray katadongan kon nagtitinguha in usa nga testigo hin pagdaot hin tawo. An mga magraot naruruyag han karat-an.

²⁹Paghahampakon manta in lurong nga mapinahitas-on.