Read Waray Samarenyo Meaning Based Mga Darahonon 2 Bible Online

Mga Darahonon 2 - Waray Samarenyo Meaning Based bible

Mga Darahonon 2

¹Anak ko, pag-admi an akon igintutdo ha imo, ngan ayaw gud hingalimti an iginpabuhat ko ha imo.

²Pamatii an kinaadman, ngan talinguhaa hin pagsabot hini.

³Tinuod, pangaroa nga mahibaro ka; pangamuyo nga makasabot ka.

⁴Pamilnga ini sugad han imo paniguro hin pagbiling hin salapi, o hin tinago nga manggad.

⁵Kon buhaton mo ini, hibabaroan mo kon ano an karuyag sidngon hin pagtahod han GINOO, ngan mauswag an imo paghibaro mahitungod han Dyos.

⁶An GINOO amo an nahatag hin kinaadman. Natikang ha iya an hibaro ngan an pagsabot.

⁷Binubuligan ngan pinanalipdan niya an magtadong ngan tangkod nga mga tawo.

⁸Pinanalipdan niya adton mga mag-upay magdumara han iba, ngan ginbabantayan niya adton mga magtinumanon ha iya.

⁹Kon mamati ka ha akon, hibabaroan mo an matadonng, an husto, ngan an maupay. Hibabaroan mo an angay mo buhaton.

¹⁰Magmamakinaadmananon ka, ngan makakalipay ha imo an imo hibaro.

¹¹Pananalipdan ka han imo kaaram ug pagsabot,

¹²ngan pupugngan ka basi diri ka makagbuhat hin sayop. Ipapahirayo ka ha mga tawo nga nag-uugsong hin kasamok pinaagi han ira mga pulong—

¹³mga tawo nga binmaya na hin matadong nga kinabuhi ngan nag-uokoy na ha kasisidman han sala,

¹⁴mga tawo nga nalilipay hin pagbuhat hin sayop ngan nagpapatakas hin magraot nga ginawian,

¹⁵diri katataporan ngan diri gud kasasarigan ini nga mga tawo.

¹⁶Makakahimo ka hin pagpugong basi diri ka masulay hin malaw-ay nga babaye nga maghuhugay ha imo pinaagi han iya magtam-is nga mga pulong,

¹⁷nga malingo han iya kalugaringon nga bana, ngan waray na pagmahal han iya baraan nga mga ginsumpaan.

¹⁸Kon kumadto ka han iya balay, naglalakat ka dida han dalan tipakadto ha kamatayon. An pagkadto didto amo an pagpahirani han kalibutan han mga patay.

¹⁹Waray may dinmuaw ha iya nga nahibalik. Diri na gud hiya makakabalik ngadto han dalan han kinabuhi.

²⁰Sanglit kinahanglan sundon mo an susbaranan han mag-upay nga mga tawo, ngan mag-ukoy ka hin matadong nga kinabuhi.

²¹Mag-ukoy dinhe hini nga aton tuna an magtadong ngan maligdong nga mga tawo.

²²Kundi aagawon han Dyos dinhe ha tuna an magraot nga mga tawo, ngan gagaboton ha tuna an mga makasasala sugad hin mga tanom.