Read Waray Samarenyo Meaning Based Mga Darahonon 20 Bible Online

Mga Darahonon 20 - Waray Samarenyo Meaning Based bible

Mga Darahonon 20

¹Nakakapaaringasa ngan nakakapatuyaw ha imo an duro nga pag-ininom. An pagkahubog usa nga pagkalurong.

²Kahadloki an nasisina nga hadi sugad han imo pagkahadlok hin nagngungurob nga liyon; an pag-aghat ha iya ngadto hin kasina usa nga pag-unay han imo kalugaringon.

³Bisan hin-o nga lurong nakakatikang hin mga lantugi; an maupay buhaton amo an paglikay hini.

⁴An parauma nga uraura hin kahubya hin pag-arado han iya kaumhan ha angay nga panahon, pag-abot han kat-ani waray gud niya pag-aanihon.

⁵An kanan tawo panhunahuna sugad hin tubig dida hin hilarom nga atabay, kundi an tawo nga maaram magbibiling hin paagi hin pagkuha han tubig.

⁶Nagsusumat an ngatanan nga hira matinumanon ngan diri maaram maglingo, kundi makuri hiagian in sugad nga tawo?

⁷Palaran an mga anak kon may nira amay nga tangkod ngan nagbubuhat hin matadong.

⁸Nalingkod an hadi dida han iya hukmanan ngan maaram hiya han maraot, kon iya ini hinkikit-an.

⁹May-ada ba gud tawo nga makakasiring nga malimpyo na an iya kasingkasing, ngan nalinisan na hiya han iya sala?

¹⁰Napupungot an GINOO hin mga tawo nga nagamit hin diri tuptop nga mga timbangan ngan mga taraksan.

¹¹Bisan an bata nagpapakita kon hin-o hiya pinaagi han iya mga buhat, hisasabtan mo kon tangkod ngan maupay hiya.

¹²Naghatag ha aton an GINOO hin mga mata nga igkirita, ngan mga durunggan nga igpamarati.

¹³Mapopobre ka kon kanunay magkinaturog ka la. Pagmaduruto ngan magkakamay-ada ka damo nga pagkaon.

¹⁴Waray hunong hin pagngurotob an pumaralit nga mahal hin duro an presyo, kundi katapos nalakat hiya ngan naparayaw nga hiya nakahangyo.

¹⁵Kon maaram ka han imo ginyiyinakan, may-ada ka naangkon nga marumahal pa kay hin mga alahas ug bulawan.

¹⁶An bisan hin-o nga lurong nga nagsasaad hin pagbayad han utang hin tawo nga diri niya kinikilala angay kuhaan han iya kalugaringon nga hiagi basi magamit hin pagbayad.

¹⁷An imo maangkon pinaagi hin limbong, pagpapahimulosan mo sugad han girarasahi nga pagkaon, kundi ha kataposan, masusugad ini hin usa ka timo nga baras.

¹⁸Pangaro hin maupay nga sagdon ngan ikaw magmamainuswagon, kon waray ka maupay nga plano hin pakig-away, ayaw pagpasipara hin pagsulong.

¹⁹Diri gud an paglibak makakatipig hin sekreto. Pahirayo tikang hin mga tawo nga magyakan hin duro.

²⁰Kon pagpakaraoton mo an imo mga kag-anak, matatapos an imo kinabuhi sugad hin suga nga napaparong dida han kasisidman.

²¹Kon masayon la nimo maangkon an imo manggad, gutiay la nga kaupayan an ihahatag hini ha imo.

²²Ayaw paglugaring hin pagbulos hin kasaypanan. Sarigi la an GINOO ngan iya ka bubuligan.

²³Napupungot an GINOO hin mga tawo nga nagamit hin diri tuptop nga mga timbangan.

²⁴An GINOO an nagbuot han aton dalan; sanglit uunanhon hin tawo hin pakasabot kon tikain an iya kalugaringon nga kinabuhi?

²⁵Paghunahunaa anay hin maupay nga diri ka pa magsasaad hin halad ngadto ha Dyos. Bangin mo ini pagbasolan ha orhe.

²⁶Nakakasabot in hadi nga makinaadmananon kon hin-o in nagbubuhat hin sayop, ngan pagkakastigohon hiya hin waray kalooy.

²⁷Gintagan kita han GINOO hin hunahuna ug konsensya; diri kita makakatago tikang ha aton kalugaringon.

²⁸Magpapabilin an hadi dida ha kagamhanan samtang tangkod, matadong, ngan maupay an iya pamunoan.

²⁹Dinadayaw ta an kusog han mga batan-on, ngan tinatahod ta an mga uban han pagkalagas.

³⁰Usahay kinahanglan ta in makuri nga kaagi ha kinabuhi, basi makabalhin kita han aton mga paagi.