Read Waray Samarenyo Meaning Based Mga Darahonon 26 Bible Online

Mga Darahonon 26 - Waray Samarenyo Meaning Based bible

Mga Darahonon 26

¹Diri nahaaangay an pagdayaw hin usa nga lurong, sugad ini hin yelo ha panahon nga katsirak o uran ha panahon hin kat-ani.

²Diri ka dudutlan hin gaba labot kon angay ini ha imo; sugad ini hin nalabay ngan diri gud nahapon nga mga tamsi.

³Kinahanglan paglatigohon mo an kabayo, pagbukadohan mo an asno, ngan paglambahon mo an lurong nga tawo.

⁴Kon pagbatonon mo in linurong nga pakiana, sugad ka la hin kalurong han tawo nga nagpakiana hini.

⁵Batona hin linurong an linurong nga pakiana, ngan makakasabot an nagpakiana nga diri ngay-an hiya sugad hin kalisto ha iya paghunahuna.

⁶Kon padad-on mo hin mensahe an tawo nga lurong, nag-uunay ka la hin pag-utod han imo mga tiil, nagbibiling ka hin kasamokan.

⁷An lurong nga nagamit hin darahonon, sugad la hin piay nga nagamit han iya mga tiil.

⁸An nagdadayaw hin lurong nga tawo sugad hin tawo nga nagamit hin usa nga bato nga bala han iya santik.

⁹An lurong nga nagsasag-ulo hin maupay nga puplonganon nakakapahinumdom ha imo hin hubog nga nagkukuha hin basuni dida han iya kamot.

¹⁰An agaron nga nagsusuhol hin bisan hin-o nga lurong o parahubog nga nalabay, sugad hin parapana nga nakakasamad kan bisan hin-o.[41]

¹¹An lurong nga nagliliwat hin tinuyaw nga iya nabuhat, sugad hin ayam nga nalaklak han iya iginsuka.

¹²Mauruupay pa an gilulurongi nga tawo kay hin tawo nga napakamakinaadmananon, kundi diri man ngay-an.

¹³Kay ano nga diri nagawas han iya balay an tawo nga hubya? Ano an iya nahahadlokan? Mga liyon ba?

¹⁴Naglulurulimbag dida han iya higdaan an tawo nga hubya. Diri hiya napahirayo sugad hin sada nga natataod hin bisagra ngan sigi la an pagkinaaroabre.

¹⁵May mga tawo nga duro na hin kahubya bisan hin paghungit hin pagkaon ha ira mga baba.

¹⁶Naghuhunahuna in tawo nga hubya nga labaw hiya hin kalisto kay hin pito ka tawo nga nakakahatag hin maupay nga pangatadungan para han ira panhunahuna.

¹⁷An paghiapi hin lantugi nga waray mo labot, sugad la hin pagdakop hin ayam nga nalabay ha kalsada pinaagi hin paggamit ha talinga.

¹⁸An tawo nga naglilimbong hin iba ngan katapos nasiring nga intrimis la niya, sugad hin tuyaw nga nag-uuyag hin makamaratay nga hinganiban.

²⁰Napaparong an kalayo kon waray sungo; naundang an lantugi kon waray paglibak.

²¹An uring nakakapasiga han mga baga, an sungo nakakapalaga han kalayo, ngan an mga magsamok nakakaaghat hin mga lantugi.

²²Hin kamarasa han paglinibak! Hin kamakaruruyag gud hin pagtulon hini!

²³An diri kinasingkasing[42] nga pagyakan nga nagtatahob han imo matuod nga ginhuhunahuna sugad hin mainggat nga pintora[43] ha matapok nga daba.

²⁴An malabyaw nagtatago han iya kapungot ha luyo hin mga ulog-ulog.

²⁵Bangin maupay pamation an mga pulong, kundi ayaw hiya pagtuora, kay nagsasapay hin pagdumot an iya kasingkasing.

²⁶Bangin matahoban niya an iya kapungot, kundi makita an ngatanan han magraot nga mga butang nga iya ginbubuhat.

²⁷An mga tawo nga nagbubutang hin bitik para hin iba, nabibitik ngahaw hira. Napupusdakan hin tuna an mga tawo nga nagtitikang hin pagpanas hin tuna.

²⁸Kinahanglan magdumot ka anay han tawo nga karuyag mo pagdaoton pinaagi hin mga buwa. An diri kinasingkasing nga pagyakan nagdadara gudla hin karat-an.